اسلام آباد: صدر مملکت ڈاکٹر عارف علوی نے پوری قوم، سمندر پار پاکستانیوں اور عالمی برادری سے سیلاب زدگان کی امداد کی اپیل کرتے ہوئے کہا ہے کہ سیلاب نے لوگوں کی زندگی اور معاش کو تباہ کر دیا ہے۔
تفصیلات کے مطابق صدر مملکت ڈاکٹر عارف علوی نے پوری قوم، سمندر پار پاکستانیوں اور عالمی برادری سے سیلاب زدگان کی امداد کی اپیل کردی۔
صدر مملکت کا کہنا تھا کہ پوری قوم، سمندر پار پاکستانی اور عالمی برادری متاثرین کی مدد کے لیے آگے آئے، سیلاب متاثرین کو ریسکیو، ریلیف اور بحالی کی اشد ضرورت ہے۔
انہوں نے کہا کہ پاکستان بھر میں سیلاب نے لوگوں کی زندگی اور معاش کو تباہ کر دیا ہے، سڑکوں، پلوں اور مواصلاتی نظام کے بنیادی ڈھانچے کو نقصان پہنچا ہے۔
صدر مملکت نے اپیل کرتے ہوئے کہا کہ قوم نے ماضی میں بھی غیر معمولی انسان دوستی کے جذبے کا مظاہرہ کیا، ایک بار پھر قوم امدادی کوششوں میں دل کھول کر اپنا حصہ ڈالے۔