دبئی: بھارتی ٹیم کے سابق ہیڈ کوچ روی شاستری نے ٹی ٹوئنٹی انٹرنیشنل سیٹ اپ میں فاسٹ بالر محمد شامی کو مکمل طور پر نظر انداز کرنے پر کپتان روہت شرما اور کوچ راہول ڈریوڈ پر سخت تنقید کی ہے۔
ایشیا کپ کے سپر 4 مرحلے میں بھارت اور سری لنکا کے درمیان جاری میچ کے دوران تبصرہ کرتے ہوئے روی شاستری نے محمد شامی کو ٹی ٹوئنٹی سے مکمل طور پر باہر کیے جانے پر اپنی ناراضگی ظاہر کرتے ہوئے کہا کہ ٹیم مینجمنٹ اور سلیکٹرز کو اس سال کے آئی پی ایل میں شانداع کارکردگی کے بعد شامی کو دیکھنا چاہیے تھا۔
انہوں نے کہا کہ "میں یہ دیکھ کر پوری طرح حیران ہوں کہ محمد شامی کو موجودہ ہندوستانی ٹیم مینجمنٹ اور سلیکٹرز نے کس طرح نظر انداز کیا ہے۔
روی شاستری نے کہا کہ اس سال کے ایشیا کپ میں ہندوستانی بولنگ اتنی موثر نہیں لگ رہی ہے اور شامی جیسے تجربہ کار کو یقینی طور پر اسکواڈ میں جگہ بنانی چاہیے تھی۔
سابق کوچ نے کہا کہ "ہم نے دیکھا کہ کس طرح پچھلے T20 ورلڈ کپ میں ڈیو کی وجہ سے اسپنر مکمل طور پر غیر موثر ہوگئے تھے، اس وجہ سے محمد شامی ایشیا کپ کے لیے بہترین انتخاب ہو سکتا تھا۔
خیال رہے کہ محمد شامی نے انڈین پریمئیر لیگ میں گجرات ٹائٹنز کی نمائندگی کرتے ہوئے 16 میچوں میں 24.40 کی اوسط اور 8 کے اکانومی ریٹ کے ساتھ 20 وکٹیں حاصل کی تھی۔
