فلم انڈسٹری کی سینئر اداکارہ ریشم نے دریا میں مچھلیوں کے کھانے کے لیے گوشت اور ڈبل روٹی کے ساتھ پلاسٹک کی تھیلیاں پھینکنے پر معافی مانگ لی۔
کچھ روز قبل ریشم نے فیس بک پیج پر ایک ویڈیو پوسٹ کی تھی جس میں بظاہر وہ ایک پُل پر اپنی گاڑی سے نیچے اتر کر پلاسٹک کی تھیلی سے گوشت کے ٹکڑے اور پھر ڈبل روٹی نکال کر دریا میں مچھلیوں کے لیے پھینک رہی ہیں۔
تاہم ساتھ ہی گوشت اور ڈبل روٹی سے بھری پلاسٹک کی تھیلیاں خالی ہونے پر اداکارہ کو انہیں بھی دریا میں پھینکتے ہوئے دیکھا گیا۔
سوشل میڈیا پر یہ ویڈیو وائرل ہوئی تو صارفین نے ریشم کو ماحولیاتی اور آبی آلودگی کے نقصانات سے آگاہ نہ ہونے پر آڑے ہاتھوں لیا۔
تاہم اب اداکارہ ریشم نے اس معاملے کی وضاحت پیش کی ہے۔
انہوں نے کہا کہ جو کچھ بھی ہوا بے دھیانی اور بے خیالی میں ہوا میری معذرت قبول کرلیں۔
ریشم نے کہا میں ذاتی طور پر آلودگی کے خلاف ہوں، انسان ہوں غلطیاں ہوجاتی ہیں اس فعل پر پوری قوم سے معافی مانگتی ہوں۔
اداکارہ نے مزید کہا کہ کوشش کروں گی کہ آئندہ ایسی غلطی سرزد نہ ہوں ایک بار پھر دل کی گہرائیوں سے آپ سے معافی مانگتی ہوں۔
