سمرقند : وزیراعظم شہبازشریف کی روسی صدرولادیمیرپیوٹن سے ملاقات طے ہوگئی، باضابطہ ملاقات شنگھائی تعاون تنظیم اجلاس کے موقع پر ہوگی۔
تفصیلات کے مطابق ازبکستان میں شنگھائی تعاون تنظیم کی سربراہان کونسل کا 22وا ں اجلاس شروع ہوگیا ہے، جس میں شرکت کیلئے وزیراعظم شہباز شریف سمرقند پہنچ گئے۔
ذرائع کا کہنا ہے کہ وزیراعظم شہبازشریف کی روسی صدرولادیمیر پیوٹن سے ملاقات طے ہو گئی، پاکستان اور روس کے رہنماؤں کی پہلی باضابطہ ملاقات شنگھائی تعاون تنظیم اجلاس کے موقع پر ہوگی۔
ذرائع نے بتایا کہ وزیراعظم شہبازشریف ملک میں حالیہ تباہ کن سیلابی صورتحال سےآگاہ کریں گے، ملاقات میں اقتصادی، تجارتی، توانائی سمیت متعددشعبہ جاتی تعاون اور منصوبوں پر گفتگو ہوگی۔
ذرائع کا کہنا تھا کہ دوران ملاقات پاک، روس بین الحکومتی کمیشن کے آٹھویں اجلاس کے جلد انعقاد پر بھی غور کیا جائے گا۔
ذرائع کے مطابق ساتواں بین الحکومتی کمیشن اجلاس 2021میں روس میں ہوا اور آئندہ اجلاس اسلام آبادمیں متوقع ہے ، جس میں دونوں ممالک کی قیادت افغانستان کی صورتحال پر بھی تفصیلی تبادلہ خیال کرے گی۔
