گلابی نمک کو لاہوری یا ہمالین نمک بھی کہا جاتا ہے، یہ صحت کے لیے مفید ہے، سفید نمک کے برعکس گلابی نمک پروسیسنگ کے مختلف مراحل سے نسبتاً کم گزارا جاتا ہے۔
گلابی نمک کو اپنی غذا کا حصّہ کیوں بنایا جائے؟ دراصل کم پروسیسنگ کی وجہ سے اس میں پوٹاشیئم٬ کیلشیئم اور میگنیشیئم جیسے کئی صحت بخش اجزا برقرار رہتے ہیں۔
اصل حالت میں موجود ہونے کے باعث اس نمک کے کئی طبی فوائد میں سے ایک وزن میں کمی بھی شامل ہے۔
وزن کم کرنے کے خواہش مند افراد کو گلابی نمک استعمال کرنا چاہیے، کیوں کہ یہ جسم میں معدنیات کے توازن کو برقرار رکھتا ہے، اس کے علاوہ جنک فوڈ کی طلب کو کم کرتا ہے اور ساتھ ہی جسم میں پائی جانے والی خراب چربی کو بھی ختم کرتا ہے۔
گلابی نمک نظامِ ہضم کے مسائل میں بھی مفید ہے، قبض یا اپھارے کے مریضوں کے لیے یہ کافی فائدہ مند ہے۔
کھانا ہضم نہ ہو تو گلابی نمک، بڑی الائچی، خشک پودینے کی پتیاں، دیسی اجوائن اور کالی مرچ ہم وزن لے کر باریک پیس لیں۔ پھر اس سفوف کو ایک گلاس پانی میں حل کر کے ابال لیں۔ جب پانی نصف رہ جائے تو اسے چھان کر نیم گرم پی لیں۔
اس سے بدہضمی اور اپھارے کی شکایت دور ہو جائے گی۔
دانت کے درد کے لیے بھی گلابی نمک کا استعمال کیا جا سکتا ہے، نمک پیس کر کپڑے میں چھان لیں، اور 4 حصے سرسوں کے تیل میں ملا کر انگلی سے منجن کی طرح استعمال کریں۔
دانتوں اور مسوڑھوں کی تکلیف سے آرام آ جائے گا۔
