راولپنڈی میں منشیات کے عادی افراد کی تعداد میں خطرناک حد تک اضافہ ہوگیا ہے اور ان کے حوصلے اتنے بلند ہوگئے ہیں کہ وہ تھانے کے آگے ڈیرے ڈال کر نشہ کرنے لگے ہیں۔
پولیس کے بہت سارے فرائض میں سے ایک فرض منشیات کا قلع قمع بھی کرنا ہے لیکن یہاں تو چراغ تلے اندھیرا کے مترادف نشئی افراد تھانوں کے باہر دھڑلے سے نشہ کرنے لگے ہیں جس کی ویڈیو منظر عام پر آگئی ہے۔
زیر نظر ویڈیو دیکھ کر اندازہ لگایا جاسکتا ہے کہ یا تو پولیس اپنے فرائض منصبی پورا کرنے میں ناکام ہے یا پھر منشیات کے عادی افراد کے حوصلے اتنے بلند ہوگئے ہیں کہ انہیں بلا خوف وخطر تھانے کی دیوار کے سائے میں نشے کی لت پوری کرنی شروع کردی ہے۔
زیر نظر ویڈیو راولپنڈی کے تھانہ گنجمنڈی سٹی پیر ودھائی کے باہر کی ہے جس میں دیکھا جاسکتا ہے کہ تھانے کے مرکزی دروازے کی دیوار کے ساتھ ہی باہر منشیات کے عادی افراد ٹولیوں کی شکل میں بیٹھے ہیں اور کھلے عام بلا خوف وخطر اپنا نشہ پورا کر رہے ہیں۔
اس حوالے سے شہریوں نے ریجنل پولیس آفیسر اور سی پی او راولپنڈی سے منشیات فروشی میں ملوث افراد کے خلاف بھرپور قانونی کارروائی کا مطالبہ کیا ہے۔
