خیبر ایجنسی: فورسز نے کارروائی کرتے ہوئے پندرہ دہشتگردوں کو ہلاک کردیا ہے۔
شمالی وزیرستان میں آپریشن ضربِ عضب کامیابی سے جاری ہے تاہم دیگر علاقوں میں بھی دہشتگردوں کی سرکوبی کے لئے پاک فوج کی کارروائیاں جاری ہیں، خیبر ایجنسی میں تازہ کارروائی کے دوران پندرہ دہشتگرد ہلاک کردیئے گئے جبکہ کارروائی میں دہشتگردوں کے تین ٹھکانوں کو نشانہ بنایا گیا۔
اس سے قبل خیبر ایجنسی کی تحصیل باڑہ کے علاقے ملک دین خیل اور کوہی شیر حیدر میں پاکستانی جیٹ طیاروں نے دہشت گردوں کے ٹھکانوں کو نشانہ بنایا، جس میں دوشدت پسند ہلاک اور آٹھ کے زخمی ہوگئے۔
جون دو ہزار چودہ میں شروع کیا گیا آپریشن ضربِ عضب کامیابی سے جاری ہے ، پاک فوج کی جانب سے آپریشن ضربِ عضب میں اب تک نو سو سے زائد دہشت گردوں کو ہلاک کیا جاچکا ہے، متعدد بارودی سرنگیں بنانے کی فیکٹریاں تباہ کر دی گئیں ہیں جبکہ بڑی مقدار میں گولہ بارود بھی پکڑا جا چکا ہے۔
