ریاض : سعودی عرب میں تجارتی سامان کی منتقلی کرنے والے مال بردار ٹرک مالکان کو حکومت کی جانب سے اہم ہدایات جاری کی گئی تھیں جس کی مہلت ختم ہونے میں کم وقت رہ گیا ہے۔
اس حوالے سے سعودی ذرائع ابلاغ کا کہنا ہے کہ ٹرانسپورٹ جنرل اتھارٹی کی جانب سے لوڈنگ ٹرکس کے مالکان کو دی جانے والی مہلت سات دسمبر کو ختم ہوگی۔
غیر ملکی خبر رساں ادارے کی رپورٹ کے مطابق مذکورہ مہلت ایسے ٹرک مالکان کے لیے ہے جنہوں نے اپنی گاڑیوں کی رجسٹریشن کمرشل کے طور پر نہیں کرائی ہے۔
ذرائع کے مطابق ٹرانسپورٹ جنرل اتھارٹی نے مملکت میں مال بردار ٹرک مالکان کو ہدایت کی تھی کہ وہ سات دسمبر2022 تک اپنے ٹرکوں کو جنہیں وہ مملکت میں سامان کی منتقلی کے لیے تجارتی بنیادوں پراستعمال کرتے ہیں، کی نمبرپلیٹ اور رجسٹریشن کو نجی کے بجائے کمرشل کرالیں۔
اتھارٹی کی جانب سے کہا گیا تھا کہ قانون کے مطابق وہ لاجسٹک کمپنیاں یا نقل وحمل کے لیے استعمال ہونے والی ہیوی ڈیوٹی گاڑیوں کے جن مالکان نے ہیوی لوڈنگ گاڑیوں کی رجسٹریشن کمرشل کے بجائے نجی کرائی ہے وہ بغیر کسی اضافی رقم یا جرمانے کے اپنی گاڑیوں کی رجسٹریشن کمرشل کے طور پر کرالیں۔
مہلت کے ختم ہونے کے بعد ٹرانسپورٹ جنرل اتھارٹی کی جانب سے مملکت کے تمام شہروں میں تفتیشی کارروائیاں شروع کی جائیں گی ایسے افراد جو قانون شکنی کے مرتکب پائے جائیں گے ان کے خلاف سخت تادیبی کارروائی کی جائے گی۔
