تہران: ایران کا سرکاری چینل ہیک ہو گیا، ہیکرز نے سپریم لیڈر آیت اللہ خامنہ ای کے خلاف پیغام نشر کر دیا۔
غیر ملکی میڈیا کے مطابق ایران میں ہیکرز نے نیوز بلیٹن کے دوران سرکاری چینل ہیک کر لیا، ہیکرز نے مقتول لڑکی مہسا امینی سے اظہار یک جہتی کیا اور آزادی کی جدوجہد کے پیغامات نشر کیے۔
اسکرین پر ’آپ ہمارا ساتھ دیں، ہمارے ساتھ آواز اٹھائیں، ہمارے نوجوانوں کا خون آپ کے ہاتھوں پر ہے‘ کے پیغامات کے ساتھ زن، زندگی اور آزادی کے نعرے گونج رہے تھے۔
ایران میں طالبہ مہسا امینی کی پولیس حراست میں ہلاکت کے خلاف احتجاج کرنے والے ہیکرز نے سرکاری چینل آئی آر آئی بی کو ہیک کیا۔
گزشتہ شام 6 بجے کے نیوز بلیٹن میں آیت اللہ خامنہ ای کا بیان نشر کیا جا رہا تھا کہ اچانک اسکرین پر ایک ماسک نمودار ہوا اور پھر رہبر اعلیٰ کی تصویر کے گرد شعلے دکھائی دینے لگے۔
ایرانی سپریم لیڈر کی تصویر پر ماتھے پر بندوق کے ہدف کا نشان بھی بنایا گیا۔
اسکرین پر مہسا امینی اور مظاہروں کے دوران ہلاک 3 خواتین کی تصاویر بھی لگائی گئیں، ہیکرز نے اپنا تعارف عدالتِ علی کے نام سے کروایا۔
