بھارت کی ریاست مہاراشٹر میں حالیہ بارشوں اور سیلاب نے فصلیں تباہ کردیں جس کی وجہ سے 9 کسانوں نے خودکشی کرلی۔
کشمیر میڈیا سروس کے مطابق ریاست مہاراشٹر کے علاقے ودربھ میں سیلاب کے باعث فصلیں تباہ ہونے کی وجہ سے شدید مالی مشکلات کا سامنا کرنے والے 9 کسانوں نے خودکشی کی ہے۔
خودکشی کرنے والے کسانوں کی بیوائوں کی فلاح وبہبود کیلئے کام کرنے والی این جی او ‘ودربھ جن آندولن سمیتی’نے بتایا کہ گزشتہ تین دنوں میں9 کسانوں نے مالی مشکلات کے باعث خودکشی کی ہے۔
این جی او کی جانب سے جاری کردہ رپورٹ میں کہا گیا ہے کہ مہاراشٹر میں مسلسل بارشوں اور سیلاب کی وجہ سے کسانوں کی کھڑی فصلیں تباہ ہو گئی ہیں اب ان کے پاس فصل بونے کے لیے بھی پیسے نہیں ہیں۔
این جی او نے بتایا کہ صورتحال یہ ہے کہ کسانوں کو اپنے خاندانوں کے لیے روزی روٹی کا بندوبست کرنا بھی مشکل ہو گیا ہے۔جبکہ انہیں بینکوں اور دیگر قرض دہندگان سے بھی کوئی راحت نہیں مل رہی ہے۔ جس کے نتیجے میں کسان خودکشی جیسا انتہائی قدم اٹھا رہے ہیں۔
این جی او کے مطابق ودربھ میں خودکشی کرنے والے کسانوں کی شناخت گنیش اڈے،لتا چاہولے سوپنل پچ بھائی، برجیش ہدے ، شنکر ڈانکے ، ساگر ڈھولے، ستیش موہود، منگیش ستکھیڑے اور بھاسکر پاردھی کے طورپر ہوئی ہے ۔
ان کسانوں کا تعلق یوتمال اور ودربھ کے اضلاع سے ہے جو بارش سے سب سے زیادہ متاثر ہوئے ہیں۔ یاد رہے کہ سن 2018 میں بھی کسانوں کی خود کشی کے 186 واقعات درج ہوئے تھے۔
اس کے علاوہ 2020 کے ماہِ نومبر میں 300 کسانوں نے خودکشی کی تھی۔ خودکشی کے سب سے زیادہ 120 واقعات مراٹھواڑہ میں درج کئے گئے تھے جب کہ وردبھ علاقے میں 112 ایسے واقعات کا اندراج کیا گیا تھا۔
واضح رہے کہ بھارت کے شمالی علاقوں میں مسلسل بارش سے کے دوران 18 افراد ہلاک ہوئے ہیں۔
