اسلام آباد: الیکشن کمیشن آف پاکستان نے پولنگ کے دوران موبائل فون کے استعمال پر سخت قانونی کارروائی کا حکم دے دیا۔
تفصیلات کے مطابق ملک میں 11 خالی نشستوں پر ضمنی انتخاب کے دوران چند پولنگ اسٹیشنز میں موبائل فون کے استعمال پر الیکشن کمیشن نے نوٹس لے لیا۔
ای سی پی نے متعلقہ آر او، ڈی آر او اور صوبائی الیکشن کمشنرز کو ہدایات جاری کر دیں، اور کہا کہ پولنگ اسٹیشن میں موبائل فون استعمال پر قانونی کارروائی کی جائے۔
الیکشن کمیشن نے کہا کہ پولنگ اسٹیشن میں ووٹرز کا موبائل لے جانا سختی سے منع ہے، ایسا عمل سیکریسی آف بیلٹ پیپر کی خلاف ورزی ہے۔ ای سی پی نے ہدایت کی ہے کہ خلاف ورزی پر ووٹر کا فون ضبط، اور ملزم کو پولیس کے حوالے کیا جائے گا۔
قومی اسمبلی کے 8، پنجاب اسمبلی کے 3 حلقوں میں ضمنی انتخابات کا میلہ سج گیا، ووٹنگ جاری
واضح رہے کہ کراچی میں ایک ووٹر نے میوزک لگا کر ووٹ کاسٹ کیا، ووٹر کی جانب سے ویڈیو میں پولنگ عملے کو بھی دکھایا گیا، کمرے کے اندر کسی نے ووٹر کو ویڈیو بنانے سے نہیں روکا، ووٹر نے ووٹ کاسٹ کرنے کی ویڈیو سوشل میڈیا پر پوسٹ کر دی۔
مردان میں بھی این اے 22 میں ووٹر نے الیکشن کمیشن ضابطہ اخلاق کی خلاف ورزی کی، ووٹر نے بیلٹ پیپر پر مہر لگانے کی ویڈیو بنا کر سوشل میڈیا پر ڈال دی۔
