اسلام آباد : مسلم لیگ ن کے رہنماؤں وامیدواروں نے ضمنی انتخابات میں شکست کی ذمہ داری مریم نواز،حمزہ اور پارٹی قیادت پر عائد کر دی۔
تفصیلات کے مطابق پارٹی کے رہنمااور لیگی امیدوار ضمنی انتخابت میں شکست پر پھٹ پڑے۔
پارٹی ذرائع نے بتایا ہے کہ رہنماؤں وامیدواروں نے شکست کی ذمہ داری مریم نواز،حمزہ اور پارٹی قیادت پرعائد کر دی۔
رہنماؤں نے گلہ کیا کہ پنجاب میں موسیٰ گیلانی بڑی لیڈ سے جیت سکتے ہیں تو ن لیگ بھی جیت سکتی تھی۔
رہنماؤں نے شکوے کرتے ہوئے کہا کہ عمران خان نے50 سے زائد جلسے کیے،ہماری قیادت نےانتخابی مہم میں حصہ نہ لیا، مریم نواز انتخابی مہم چلانے کی بجائےلندن روانہ ہوگئیں، حمزہ گھر سے ہی نہ نکلے۔
رہنماؤں وامیدواروں کا کہنا تھا کہ مسلم لیگ ن غیر منظم ہوچکی ہے، رہنما اپنی ذات تک محدود اور وفاقی وزرا پارٹی ورکرز کو اہمیت نہیں دیتے۔
ذرائع نے کہا ہے کہ جماعت کے صدر وزیراعظم شہبازشریف ہیں ان کے پاس بھی پارٹی کے لیے وقت نہیں، سوشل میڈیا، پارٹی ونگز اور کارکنان متحرک نہیں جس کی بڑی وجہ لیڈر شپ کا ایکٹو نہ ہونا ہے۔
رہنماؤں کا مؤقف میں کہنا ہے کہ مسلسل مہنگائی، بجلی کےبھاری بل، پارٹی کا مفاہمانہ بیانیہ شکست کی وجوہات بنے۔
ذرائع کے مطابق پارٹی رہنماؤں کے گلے شکووں سے نواز شریف کو آگاہ کر دیا گیا ہے۔
