لزبن : یورپ کے جنوب میں واقع ملک پرتگال کی حکومت نے بیرون ملک سے آنے والے غیر ملکیوں کی دی جانے والی سہولیات اور ان کے ویزوں سے متعلق اہم اعلان کیا ہے۔
اس سلسلے میں پرتگال کی فارنرز اینڈ بارڈرز سروس (ایس ای ایف) نے اعلان کیا ہے کہ گولڈن ویزا کی تجدید کے لیے کل 19ہزار درخواستیں زیر التوا ہیں جو کہ کل تعداد کا 60 فیصد سے زائد ہے۔
شینگن ویزا انفو ڈاٹ کام کی رپورٹ کے مطابق ذرائع نے انکشاف کیا ہے کہ گولڈن ویزوں کی تجدید ہر دو سال بعد لازمی ہے جب کہ اس حوالے سے بارڈر سروس نے واضح کیا ہے کہ غیر ملکی شہریوں کی مستقل رہائش سے متعلق دستاویزات اور ویزوں کی منظوری میں 31 دسمبر 2022تک توسیع کر دی گئی ہے۔
اعلان میں اس بات پر زور دیا گیا ہے کہ بین الاقوامی ہوائی اڈوں پر معیاد ختم ہونے والی دستاویزات قبول نہ ہونے کے باعث مسافروں کو مشکلات کا سامنا کرنا پڑرہا ہے جبکہ کچھ ویزا ہولڈرز پر ملک میں داخلے پر پابندی عائد ہے۔
پولیٹیکو رپورٹ کے مطابق ایس ای ایف نے ان رہائشی اجازت ناموں کی تجدید کے لیے تقریباً 7ہزار آسامیاں کھول دی ہیں تاہم کُل 2ہزار آسامیاں خالی رہ گئی تھیں۔
ایس ای ایف ترجمان کا کہنا ہے کہ گولڈن ویزا رکھنے والوں کی بڑی تعداد پرتگال میں مقیم نہیں ہے جس کی وجہ سے وہ متعلقہ دفتر میں خود کو مقررہ وقت پر پیش کرنے سے قاصر ہیں۔
واضح رہے کہ پرتگال کا ’’گولڈن ویزا پروگرام‘‘ جسے ریزیڈنسی بذریعہ سرمایہ کاری پروگرام بھی کہا جاتا ہے، یہ پروگرام دنیا کی امیر اور بااثر شخصیات کو پرتگال میں رہائش حاصل کرنے کی سہولت فراہم کرتا ہے بشرطیکہ وہ پرتگالی قوانین کی مخصوص شرائط پر پورا اتریں اور ملک میں کی گئی سرمایہ کاری سے مناسب منافع کمائیں۔
اس کے علاوہ جو سرمایہ کار پرتگال میں رہائش حاصل کرنے کا ارادہ رکھتے ہیں ان کو بھی اس اسکیم سے فائدہ اٹھانے کے لیے مخصوص شرائط کو پورا کرنے کی ضرورت ہے۔
یورپ کے جنوب میں واقع ملک پرتگال’’گولڈن ویزا اسکیم‘‘ کے لیے یورپ کے سب سے زیادہ مقبول مقامات میں سے ایک ہے جو دیگر ممالک کی امیر شخصیات کی بڑی تعداد کو اپنی طرف متوجہ کرتا ہے۔ اس کے علاوہ پرتگال کا گولڈن ویزا پروگرام دیگر ممالک کے علاوہ برطانیہ کے شہریوں کو بھی اپنی جانب متوجہ کر رہا ہے۔
اس حوالے سے برطانیہ میں پرتگالی چیمبر آف کامرس کی ڈائریکٹر کرسٹینا ہپیسلے نے کہا کہ گولڈن ویزا پروگرام میں برطانیہ کے شہریوں کی بڑھتی ہوئی دلچسپی بریکزٹ کے بعد سامنے آئی ہے۔
