اسلام آباد : تحریک انصاف کے رہنما اسد عمر نے مذاکرات کی خبروں کو فیک نیوز قرار دیتے ہوئے کہا الیکشن کی بات ہوگی تو ہم مذاکرات میں جائیں گے ورنہ نہیں۔
تفصیلات کے مطابق تحریک انصاف کے رہنما اسد عمر نے اے آر وائی نیوز کے پروگرام آف دی ریکارڈ میں گفتگو کرتے ہوئے کہا کہ میں نےکبھی نہیں کہاکہ مذاکرات ہورہےہیں، عمران خان ایک میٹنگ کیلئے گئے تھے کسی مذاکرات کیلئے نہیں۔
پی ٹی آئی رہنما کا کہنا تھا کہ کسی نے مذاکرات کے لیے رابطہ بھی نہیں کیا، ہم کئی بار کہہ چکےہیں حکومت الیکشن کااعلان کرے بات کرلیں گے الیکشن کااعلان کریں الیکشن کے لوازمات کیلئے بات کرنے کو تیار ہیں۔
اسدعمر نے دو ٹوک کہا کہ الیکشن کی بات ہوگی تو ہم مذاکرات میں جائیں گے ورنہ نہیں۔
ان کا کہنا تھا کہ 3 ماہ 6 ماہ کی باتیں مفروضے ہیں اس پرکوئی بات نہیں ہوسکتی، اس وقت سیاسی عدم استحکام کی وجہ سےپاکستان کوشدیدنقصان پہنچ رہاہے، ن لیگ کی اپنی سیاست دفن ہوتی جارہی ہے، ان کا مقصد صرف کیسز ختم کرانا ہے۔
رہنما تحریک انصاف نے کہا کہ ہمارے کسی سے کوئی مذاکرات نہیں ہورہے ، عمران خان نےصرف ایک ہی مطالبہ رکھاہےکہ الیکشن کرائے جائیں۔
اسد عمر نے مذاکرات کی خبروں کو فیک نیوز قرار دیتے ہوئے کہا کہ ان میں کوئی صداقت نہیں ہے، عمران خان واضح کہہ چکےہیں الیکشن کی تاریخ لینےآرہے ہیں ایک جلسہ کرنے نہیں۔
انھوں نے مزید کہا کہ ہم نے حقیقی آزادی مارچ کےاختتام کی تاریخ کااعلان نہیں کیا، ایف نائن پارک میں اجازت مانگی ، تحریری سوالوں کےجوابات بھی دیئے۔
رہنما پہ ٹی آئی نے بتایا کہ ہمارےپاس پلان بی،سی اوردیگرپربھی بات ہوئی ہے ، ہم نے ایسا کوئی بھی پلان نہیں بنایا ، جو آئین وقانون کےخلاف ہو۔
موجودہ حکومت کے حوالے سے اسد عمر کا کہنا تھا کہ موجودہ حکومت مینڈیٹ لے کر نہیں آئی بلکہ عدم اعتمادکے ذریعے آئی ہے، وہ عدم اعتمادکی تحریک ہے جس پر اسمبلی کہہ چکی ہے کہ بیرونی سازش سےآئی، یہ وہ عدم اعتماد کی تحریک ہے جس میں پیسہ چلا کر لوگوں کے ضمیروں کوخریداگیا، لوگوں کوبلیک میل کر کے پیسہ چلا کر پوزیشن تبدیل کی گئی ہے۔
انھوں نے کہا کہ قوم ایک طرف کھڑی ہےاورپی ڈی ایم دوسری طرف کھڑی ہے، قوم الیکشن کامطالبہ کررہی ہے جبکہ حکومت کہتی ہے ہم اقتدار میں رہنا چاہتے ہیں۔
اسد عمر کا مزید کہنا تھا لپ پی ڈی ایم کی ہٹ دھرمی کی وجہ سےملک تباہی کی طرف جارہاہے، ہم کوئی غیرآئینی مطالبہ نہیں کررہےہیں بلکہ الیکشن کامطالبہ کر رہے ہیں، قوم چاہتی ہے شفاف الیکشن ہوں اورفریش مینڈیٹ آئے۔
