اسلام آباد: آئل کمپنیز ایڈوائزری کونسل نے ملک میں تیل کی قلت کا خدشہ ظاہر کر دیا ہے، تاہم اوگرا نے ملک میں تیل کی قلت کی خبروں پر ردِ عمل دیتے ہوئے اس خدشے کو مسترد کر دیا۔
تفصیلات کے مطابق اوگرا کا کہنا ہے کہ ڈیزل کے محدود ذخیرے سے متعلق خبریں درست نہیں ہیں، ادھر او سی اے سی نے آئل اینڈ گیس ریگولیٹری اتھارٹی کو خط لکھ کر صورت حال کا نوٹس لینے کا مطالبہ کیا ہے۔
خط میں ایڈوائزری کونسل نے لکھا ہے کہ ملکی ضروریات کے مقابلے میں کم تیل درآمد کیا گیا ہے، ابھی تک تیل کمپنیوں نے تیل منگوانے کے فیصلے سے آگاہ نہیں کیا، اسٹاک کی صورت حال کے پیش نظر ملک کے مختلف حصوں میں تیل کی قلت کا خدشہ ہے۔
او سی اے سی نے مطالبہ کیا کہ اوگرا تیل کمپنیوں کو امپورٹس پلان پر عمل درآمد کا پابند بنائے۔
تاہم اوگرا نے او سی اے سی کے خدشات کو رد کر دیا ہے، ترجمان اوگرا نے بیان میں کہا کہ ملک میں ڈیزل کا وافر ذخیرہ موجود ہے، ڈیزل کے محدود ذخیرے سے متعلق اطلاعات درست نہیں ہیں۔
ترجمان اوگرا نے کہا ملکی ضرورت پوری کرنے کے لیے ڈیزل کا ذخیرہ دستیاب ہے۔