شرم الشیخ: وزیراعظم شہباز شریف کا کہنا ہے کہ ماحولیاتی انصاف کا تقاضا ہے کہ تمام ممالک مشترکہ ذمہ داری لیں۔

تفصیلات کے مطابق مصر کے شہر شرم الشیخ میں عالمی ماحولیاتی کانفرنس سے خطاب کرتے ہوئے وزیراعظم پاکستان شہباز شریف نے کہا کہ کاپ27 کی میزبانی پرمصر کےصدر کومبارکباد پیش کرتا ہوں، فورم انسانیت کی آواز بن کر ابھرا ہے۔

وزیراعظم نے رواں سال ماحولیاتی تبدیلیوں کے پاکستان پر پڑنے والے اثرات سے متعلق بتایا کہ غیرمعمولی بارشوں کے باعث طغیانی سےبڑے پیمانےپر تباہی ہوئی، سیلاب سے تین کروڑسے زائد افراد شدید متاثر ہوئےجبکہ 8ہزارکلومیٹرطویل سڑکیں اور 3ہزار کلومیٹر ریلوےٹریک متاثرہوا، سیلاب کےباعث نقصانات کا تخمینہ30ارب ڈالرلگایا گیا ہے۔

یہ بھی پڑھیں: ہمیں آئندہ نسلوں کے محفوظ مستقبل کے لیے اقدامات کرنا ہوں گے، وزیراعظم

کانفرنس سے خطاب میں وزیراعظم نے بتایا کہ پاکستان کا کاربن کے اخراج میں حصہ ایک فیصدسےبھی کم ہے، ماحولیاتی تبدیلی کےنقصانات سےمتاثرہ ملکوں کیلئےوسائل درکارہیں، اور انہیں اپنے وسائل سےاس چیلنج سےنبردآزما ہوناپڑرہاہے۔

وزیراعظم پاکستان کا کہنا تھا کہ ہم کئی سال سے اس اہم مسئلے پر بحث کررہے ہیں تاہم کوئی ٹھوس نتیجہ برآمد نہیں ہوا، ماحولیاتی انصاف کا تقاضا ہے کہ تمام ملک مشترکہ ذمہ داری لیں، جس کے لئے گلوبل رسک انڈیکس کا قیام ضروری ہے۔