کراچی : انسداد دہشت گردی عدالت نے جلاؤ گھیراؤ، پولیس مقابلہ اوراقدام قتل کے کیس میں پی ٹی آئی رہنماؤں علی زیدی اورخرم شیرزمان سمیت 15 ملزمان پرفرد جرم عائد کردی۔
تفصیلات کے مطابق انسداد دہشت گردی عدالت میں پی ٹی آئی رہنماوٴں علی زیدی ،خرم شیر زمان ،جمال صدیقی و دیگر کے خلاف دو مقدمات کی سماعت ہوئی۔
علی زیدی ،خرم شیر زمان ،جمال صدیقی ارسلان تاج،فردوس شمیم نقوی و دیگر پیش ہوئے۔
شجاعت علی ایڈووکیٹ وکیل ملزمان نے عدالت کو بتایا کہ عدالت نے تمام ملزمان کی عبوری ضمانت میں توثیق کردی ہے۔
پولیس کا کہنا تھا کہ ملزمان پر جلاوٴ گھیراوٴ ،پولیس مقابلہ اور اقدام قتل سمیت الزامات ہیں ، ملزمان کے خلاف سولجر بازار و فیروز آباد تھانے میں مقدمات درج ہیں۔
عدالت نے علی زیدی ،خرم شیر زمان ،جمال صدیقی سمیت 15 ملزمان پر فرد جرم عائد کردی تاہم ملزمان نے صحت جرم سے انکار کردیا۔
جس کے بعد عدالت نے آئندہ سماعت پر کیس کے استغاثہ کے گواہان کو طلب کرلیا۔
