کراچی : اسٹریٹ کرمنلز چند ہزار روپے کے موبائل کی خاطر قیمتی جانیں لینے لگے، رواں سال کراچی میں ڈکیتی مزاحمت پر سو سے زائد افراد جاں بحق ہوئے۔
تفصیلات کے مطابق کراچی میں اسٹریٹ کرمنلزکو کھلی چھوٹ مل گئی اور چندہزار روپے کے موبائل کی خاطر قیمتی جانیں لینے لگے۔
رواں سال کراچی میں ڈکیتی مزاحمت پر 100 سے زائد افراد جان بحق ہوئے، کورنگی زمان ٹاؤن میں مسلح ملزمان نے موبائل فون چھیننے کے دوران مزاحمت پر فائرنگ کرکے 18 سالہ عبدالباسط گورچانی کو قتل کردیا۔
ورثاء کا کہنا ہے کہ ڈاکو دندناتے پھررہےہیں، چند ہزار کے موبائل کےلئے قتل ہورہے، نئی فورس بھی بن گئی مگر پولیس کچھ نہیں کر رہی۔
کورنگی زمان ٹاؤن کا رہائشی عبدالباسط گورچانی 600 روپے یومیہ اجرت پر برگر اسٹال چلاتا تھا اور خاندان کی کفالت کےلئے جیسے ہی گھر سے نکلا مسلح ملزمان نے موبائل فون چھیننے کے دوران مزاحمت پر قتل کردیا۔
ورثاء نے بتایا کہ عبدالباسط 4 بہن بھائیوں میں سب سے بڑا تھا، پولیس ملزمان کو گرفتار کرکے قرار واقعی سزا دے۔
