سعودی ولی عہد محمد بن سلمان نے کہا ہے کہ دارالحکومت ریاض میں کنگ سلمان انٹرنیشنل ایئرپورٹ مشرق کو مغرب سے جوڑنے والے پلُ کا کردار ادا کرے گا۔
ولی عہد محمد بن سلمان نے کنگ سلمان انٹرنیشنل ایئرپورٹ کا ماسٹر پلان جاری کرتے ہوئے کہا ہے کہ یہ ایئرپورٹ دنیا بھر کے لیے گیٹ وے کے حیثیت اختیار کر جائے گا اور ریاض کو دنیا کے بڑے اقتصادی شہروں میں شامل کرنے کے حکومتی منصوبوں کو آگے بڑھائے گا۔
انہوں نے کہا کہ کنگ سلمان ایئرپورٹ ٹرانسپورٹ، سیاحت و تجارت کا انٹرنیشنل فرنٹ ہو گا اور انٹرنیشنل لاجسٹک سینٹر کے طور پر سعودی عرب کی پوزیشن مستحکم ہو گی۔
#VIDEO: Crown Prince Mohammed bin Salman announces King Salman International Airport Masterplan #KSIA @PIF_en pic.twitter.com/aexQvTUV77
— Saudi Gazette (@Saudi_Gazette) November 28, 2022
کنگ سلمان ایئرپورٹ کا شمار دنیا کے بڑے ایئرپورٹس میں ہو گا جس سے سالانہ لاکھوں مسافروں کی آمد و رفت ہو گی۔ کنگ خالد ایئرپورٹ کے موجودہ ٹرمینلز بھی کنگ سلمان ایئرپورٹ کا حصہ ہوں گے۔
ایئرپورٹ پر 6 رن وے بنائے جائیں گے اور پورے ہوائی اڈے کا رقبہ 57 مربع کلومیٹر ہو گا۔ ایئرپورٹ پر جدید سفری سہولیات کے ساتھ ساتھ تفریحی، کاروباری اور لاجسٹک مراکز قائم کیے جائیں گے۔
