قطر میں جاری دنیا کے سب سے مقبول کھیل فٹبال ورلڈ کپ میں ایران کی ویلز کے خلاف شاندار فتح نے سینکڑوں ایرانی قیدیوں کی زندگی بدل دی ہے۔
غیر ملکی میڈیا کے مطابق قطر میں جاری فٹبال ورلڈ کپ میں ایران کی ویلز کے خلاف غیر متوقع لیکن شاندار فتح کا صلہ ایرانی جیلوں میں بند قیدیوں کو ملا ہے اور 700 سے زائد قیدیوں کو فتح کی خوشی میں رہا کر دیا گیا ہے۔
غیر ملکی میڈیا کے مطابق ایران کی عدلیہ کے آن لائن پورٹل ’ میزان ‘ پر جاری بیان میں کہا گیا کہ فٹ بال ورلڈ کپ میں ایران کی ویلز کے خلاف دو صفر سے فتح کے بعد ملک کی مختلف جیلوں میں قید 709 قیدیوں کو رہا کردیا گیا۔
قید سے رہائی کا پروانہ ملنے والوں میں ایران میں جاری حکومت مخالف مظاہروں میں گرفتار کیے گئے افراد بھی شامل ہیں۔
واضح رہے کہ قطر میں جاری فیفا ورلڈ کپ میں دو روز قبل ایران نے ویلز کو صفر کے مقابلے میں دو گول سے شکست دے کر ٹورنامنٹ کا ایک اور بڑا اپ سیٹ کیا تھا۔
اس سے قبل ایرانی ٹیم ورلڈ کپ میں اپنا پہلا میچ انگلینڈ سے ہار گئی تھی۔ اس میچ میں انگلینڈ نے ایران کو دو کے مقابلے میں 6 گول سے شکست دی تھی۔