اسلام آباد : وزارت خزانہ گوگل کو ادائیگی پر راضی ہو گئی، جس کے بعد پاکستان میں گوگل ایپلیکیشن سروسز بند ہونے کا خطرہ ٹل گیا۔
تفصیلات کے مطابق وزارت خزانہ نے وزیر آئی ٹی سید امین الحق کی تجویز مان لی اور گوگل کو ادائیگی پر راضی ہو گئی۔
وزیر آئی ٹی و ٹیلی کمیونیکیشن امین الحق سے معاون خصوصی برائے خزانہ طارق باجوہ نے رابطہ کیا، اس موقع پر امین الحق نے کہا کہ ادائیگیاں مقررہ وقت کے مطابق کی جاسکیں گی اور پیڈ گوگل ایپس بند نہیں ہوں گی۔
وفاقی وزیر کا کہنا تھا کہ اسٹیٹ بینک کو ہدایت کردی گئی کہ ایک ماہ تک پالیسی پر عملدرآمد مؤخر کردیں۔ ٹیلی کام آپریٹرز کو ادائیگیوں کے طریقہ کار پر عملدرآمد کیلئے ایک ماہ کا وقت دیدیا گیا۔
امین الحق نے کہا کہ ایک ماہ کے اندر وزارت آئی ٹی، خزانہ اور اسٹیٹ بینک باہمی مشاورت سے لائحہ عمل مرتب کریں گے۔
ان کا مزید کہنا تھا کہ ٹیلی کام آپریٹرز نے وزارت آئی ٹی سے معاملے پر معاونت کی اپیل کی تھی اور وزیرخزانہ اسحاق ڈار کو ادائیگیاں کرنے اور ٹائم فریم دینے کیلئے مراسلہ لکھا تھا۔
وفاقی وزیر نے کہا کہ بروقت فیصلے پر وزیرخزانہ اسحاق ڈار اور وزیر اعظم کے معاون خصوصی طارق باجوہ کے مشکور ہیں۔
