کراچی کے علاقے محمود آبا اعظم بستی کے فلیٹ میں کیڑے مار دوار کے استعمال سے متاثر ہوکر ایک بچی ہلاک، ماں اور چار بچے بے ہوش ہوگئے۔
اے آر وائی نیوز کے مطابق کراچی کے علاقے اعظم بستی سو فٹ روڈ پر واقع بخاری ٹاور کے فلیٹ میں کیڑے مار دوا کے استعمال سے متاثر ہوکر چار سالہ بچی ہلاک، ماں اور چار بچے بے ہوش ہوگئے، متاثرہ بچوں کو قومی ادارہ برائے امراض اطفال جبکہ بچی کی لاش اور خاتون کو جناح اسپتال منتقل کیا گیا۔
ہلاک ہونے والی بچی کی شناخت ریچل دختر شہزاد کے نام سے ہوئی جبکہ بے ہوش ہونے والے بچوں میں کرسٹینا، پیٹر، اسرائیل اور فرسٹینا شامل ہیں، متاثرہ بچوں کی عمریں ساڑھے تین سال سے دس سال کے درمیان ہیں۔
متاثرہ سب سے چھوٹی بچی کی حالت تشویشناک ہے جبکہ دیگر کی حالت خطرے سے باہر ہے۔
پولیس کے مطابق متاثرہ بچوں کے والد شہزاد کا کہنا ہے کہ دو دن پہلے گھر کے کمرے میں پھٹ کر بکھرنے والی کیڑےمار دوا استعمال کی گئی تھی ، دوا کے استعمال کے لیئے کمرہ بند کر دیا گیا تھا۔
گزشتہ شام کمرہ کھول کر صفائی کی گئی، صفائی کے دوران ہی اہل خانہ کی طبعیت بگڑنے لگی تھی جسے ہم نے نظرانداز کر دیا، رات کو اہلیہ کی طبعیت بگڑنے پر اسپتال لے جانے کا کہا لیکن اس نے صبح اسپتال جانے کا کہا، رات بھر بچوں کی طبعیت مزید بگڑتی گئی۔
بچوں کو الٹیاں بھی آئی صبح ریچل کی حالت تشویشناک ہونے پر بیوی بچوں کو اسپتال لے کر پہنچا تاہم ریچل جانبر نہ ہوسکی۔
