پاکستان فلم، ٹی وی اور اسٹیج کے ماضی کے نامور اداکار افضال احمد انتقال کرگئے وہ کئی سال سے فالج کے مرض میں مبتلا تھے۔
اے آر وائی نیوز کے مطابق پاکستان فلم، ٹیلیویژن اور اسٹیج کے ماضی کے نامور اداکار افضال احمد لاہور کے اسپتال میں انتقال کرگئے۔ وہ کئی سال سے فالج کے مرض کا شکار تھے۔
جنرل اسپتال انتظامیہ کے مطابق افضال احمد کو برین ہیمرج ہوا تھا اور گزشتہ روز اسپتال لایا گیا تھا۔
دوسری جانب لیجنڈری اداکار کے لواحقین کے مطابق انہیں آخری وقت میں جنرل اسپتال میں بیڈ بھی نہ مل سکا۔
افضال احمد نے کئی دہائیوں تک اداکاری کے شعبے سے وابستہ رہے اور اپنی بے ساختہ اداکاری سے شائقین فن کو محظوظ کیا۔ انہوں نے یوں تو مختلف نوعیت کے کردار ادا کیے لیکن شہرت منفی کرداروں سے ملی۔ اداکار کو ان کی فنی خدمات پر کئی ایوارڈز سے بھی نوازا گیا۔
افضال احمد نے فلمی کیریئر کا آغاز 1968 میں فلم دھوپ اور سویرا سے کیا۔ اپنے کیرئیر میں انہوں نے 384 فلموں میں کام کیا۔ ان کی سپر ہٹ فلموں میں ”ہاشو خان، انسان اور گدھا، پہلاوار، خبردار، سدھا رستہ، سستا خون مہنگا پانی، بابل صدقے تیرے، شریف بدمعاش، وحشی جٹ، دہلیز ، بلندی ۔سمیت دیگر شامل ہیں
لیجنڈری اداکار نے درجنوں مشہور ٹی وی ڈراموں میں بی منفرد اور لازوال کردار ادا کیے۔ اسٹیج کی دنیا میں ان کا ڈراما ’’میلی چادر‘‘ کو اتنی پذیرائی ملی کہ مسلسل کئی سال تک وہ اسٹیج کیا جاتا رہا۔
مرحوم کی تدفین بیٹیوں اور ہمشیرہ کے بیرون ملک سے آمد کے بعد کی جائے گی۔
