لاہور: صوبہ پنجاب کے شہر گوجرانوالہ میں تھیلیسیمیا کا شکار بچے کی کی خواہش پوری کردی گئی اور اسے ایک روز کے لیے اعزازی سی پی او بنا دیا گیا۔
تفصیلات کے مطابق سی پی او گوجرانوالہ عمر سلامت نے تھیلیسیمیا کے مریض بچے کو ایک دن کا اعزازی سی پی او بنا کر اس کی خواہش پوری کر دی، بچے کو گارڈ آف آنر بھی پیش کیا گیا۔
تھیلیسمیا کے مرض میں مبتلا حمزہ نے سی پی او بننے کی خواہش کا اظہار کیا تھا جس پر سی پی او عمر سلامت نے اس کی خواہش پوری کرنے کے لیے فوری احکامات جاری کیے۔
ان کے احکامات کے بعد بچے کو ایک دن کے لیے اعزازی سی پی او کے اختیارات دے دیے گئے۔
اعزازی سی پی او بننے والے حمزہ نے پولیس کی تمام برانچز اور بلڈ کیمپ کا دورہ کرنے کے ساتھ ساتھ پولیس افسران کے مسائل بھی سنے، اس موقع پر حمزہ کے ساتھ اس کے والدین بھی خوش تھے۔
حمزہ کو پولیس کی جانب سے گارڈ آف آنر بھی پیش کیا گیا جبکہ اس نے یادگار شہدا پر حاضری بھی دی۔
