لاہور : سابق وزیر اعظم عمران خان کا کہنا ہے کہ اعظم سواتی کے ساتھ جو ظلم ہوا، میرے ساتھ ہو تو خودکش حملے کیلئے تیار ہوجاؤں۔
تفصیلات کے مطابق سابق وزیر اعظم عمران خان نے خیبرپختونخوا کی پارلیمانی پارٹی اجلاس سے خطاب کرتے ہوئے اعظم سواتی کا ذکر کیا۔
عمران خان نے کہا کہ اعظم سواتی کے ساتھ ظلم ہوا ہے،ہر عام آدمی ایسا ہی ردعمل دے گا ، میرے ساتھ ایسا کوئی کرے تو خودکش حملے کیلئے تیار ہوجاؤں گا۔
سابق وزیر اعظم کا کہنا تھا کہ اعظم سواتی کو پکڑ کر کوئٹہ لےجایاگیا ہے، اعظم سواتی کو کچھ ہوا تو تمام ذمہ داروں کے خلاف مقدمہ درج کریں گے۔
ارشد شریف کے حوالے سے تحریک انصاف کے چیئرمین نے کہا کہ ارشد شریف جیسے بڑے صحافی کو باہر جاکر قتل کردیا گیا، صحافی برداری پر افسوس ہے ارشد شریف کےلیے نہیں کھڑے ہورہے۔
ان کا کہنا تھا کہ ارشد شریف کے ساتھ آج ایسا ہوا تو کل کسی اور صحافی کے ساتھ بھی ہوسکتا ہے، اس لیے میں کہتا ہوں ملک کو حقیقی آزادی کی ضرورت ہے، ہماری جدوجہد جاری رہے گی،اسمبلیاں تحلیل کرنا ہمارا پہلا قدم ہوگا۔
