سندھ کا یوم ثقافت آج صوبے بھر میں جوش و خروش سے منایا جا رہا ہے اس حوالے سے مختلف سیاسی، سماجی تنظیموں کی جانب سے تقریبات ہوں گی۔
اے آر وائی نیوز کے مطابق سندھ کا یوم ثقافت آج صوبے بھر میں جوش و خروش سے منایا جا رہا ہے۔ اس حوالے سے مختلف سیاسی، ثقافتی، سرکاری اور غیر سرکاری تنظیموں کی وادی سندھ کی صدیوں پرانی ثقافت کو اجاگر کرنے کے لیے سیمینارز، ریلیوں اور کانفرنسوں کا انعقاد کیا جائے گا۔
آج شہر اور قصبات کے افراد سندھی ٹوپی اور اجرک پہن کر صوبے کی ہزاروں سال قدیم ثقافت اور روایات سے محبت کا اظہار کر رہے ہیں۔
سیاسی کارکنوں، رہنماؤں، این جی اوز، طلبہ، مزدوروں، دیہاتیوں، انجمنوں اور کارکنوں سمیت بڑی تعداد میں لوگوں نے اس دن کے موقع پر روایتی سندھی ٹوپی اور اجرک کی خریداری کی۔
سابق صدر آصف علی زرداری، وزیراعلیٰ سندھ مراد علی شاہ، وزیر اعلیٰ پنجاب پرویز الہٰی، وزیر اطلاعات شرجیل میمن، پی ٹی آئی رہنما علی زیدی نے سندھی یوم ثقافت پر صوبے میں رہنے والے تمام افراد کو مبارکباد پیش کی ہے۔
آصف زرداری نے اپنے پیغام میں پوری دنیا میں سندھی ثقافت کا دن منانے پر مبارکباد پیش کرتے ہوئے کہا ہے کہ باشعور اور مہذب قومیں اپنی ثقافت، تہذیب اور زبان کبھی بھی نہیں بھولتی۔ ذوالفقار علی بھٹو نے ثقافت کی عزت برقرار کیلیے اقدامات کیے اور سندھ نے اپنی تاریخ اور ثقافت کو ہمیشہ مقدس ومقدم رکھا۔
ان کا کہنا تھا کہ سندھ صوفی بزرگوں، علم دوستوں اور بہادروں کی دھرتی ہے۔ امن، پیار، عزت اور بھائی چارہ سندھ کی عظیم تہذیب رہی ہے۔ اہل سندھ ثقافت زندہ رکھنے کے ساتھ ہر طرح کی شدت پسندی کو جگہ نہ دیں۔
وزیر اعلیٰ سندھ سید مراد علی شاہ نے سندھ کے یوم ثقافت کے موقع پر اپنے پیغام میں کہا کہ یہ دن نسل پرستی، انتہا پسندی اور امتیازی سلوک کے خلاف دن ہے جو ہمیں بغیر کسی تفریق کے تمام روایات اور رسومات کا احترام کرنے کا سبق دیتا ہے۔
وزیراعلیٰ پنجاب چوہدری پرویز الہٰی نے کہا کہ سندھ کی ثقافت دلکش روایات کی امین ہے جو مہمان نوازی، رواداری اور محبت کے جذبوں سے مالا مال ہے۔
