اسلام آباد : تحریک انصاف کے رہنما عثمان ڈار نے کہا ہے کہ موجودہ حکومت کے نااہل تجربہ کاروں نے 8 مہینے میں پوری قوم کا معاشی دیوالیہ نکال دیا۔
یہ بات انہوں نے وزیر دفاع خواجہ آصف کے بیان پر اپنے ردعمل میں کہی، ان کا کہنا تھا کہ ہم امپورٹڈ حکمرانوں کو سیلاب کے پیچھے چھپ کر معاشی تباہی کرنے والوں کی جان نہیں چھوڑیں گے۔
عثمان ڈار نے کہا کہ پاکستان کو ہونے والے اربوں ڈالرز کے نقصان کے بذات خود آپ ذمہ دار ہیں، پروجیکٹ پی ڈی ایم لانچنگ سے پہلے ہی ناکام ہوگیا ہے۔
انہوں نے وزیر دفاع خواجہ آصف کو مخاطب کرتے ہوئے کہا کہ عوام میں جانے سے آپ کا ڈر اور خوف ہماری جیت کا واضح ثبوت ہے۔
پی ٹی آئی رہنما کا کہنا تھا کہ عام انتخابات میں عوام ثابت کردے گی کہ ان پر حکمرانی کرنے کا حق چوروں اور ڈاکوؤں کا کسی صورت نہیں ہوسکتا۔
عثمان ڈار کا مزید کہنا تھا کہ کرپشن ختم کرنے کی بجائے اپنے کرپشن کیسز ختم کرنے والی حکومت مسترد ہوچکی ہے، عمران خان دوبارہ اقتدار میں آئے گا، یہ تمام مقدمات پھر کھلیں گے۔
