کراچی: شہر قائد میں منشیات تیار کرنے کے دوران منشیات فروش کے رقص کی ویڈیو وائرل ہوئی تھی، جس پر پولیس حرکت میں آ گئی اور ملزم کو ڈھونڈ نکالا گیا۔
تفصیلات کے مطابق سوشل میڈیا پر ایک ویڈیو وائرل ہوئی تھی، جس میں ایک شخص منشیات کی تیاری کے دوران جھوم رہا ہے، یہ ویڈیو سامنے آنے پر ایس ایس پی ضلع ساؤتھ سید اسد رضا نے فوری نوٹس لے لیا۔
کلفٹن پولیس نے ملزم کو 24 گھنٹے کے اندر اندر ٹریس کر کے گرفتار کر لیا، ملزم کی شناخت نثار خٹک ولد الیاس گل کے نام سے ہوئی ہے، جو شہر کے مختلف علاقوں میں منشیات فروشوں کو منشیات کی سپلائی میں ملوث ہے۔
گزشتہ روز سوشل میڈیا پر ملزم کی ایک ویڈیو وائرل ہوئی تھی جس میں ملزم منشیات کی تیاری اور رقص میں مصروف تھا۔
ملزم کی اُس ویڈیو کی بنیاد پر ملزم کی تلاش شروع کی گئی، لیکن اسی دوران ہی کلفٹن پولیس کو ملزم گِزری میں واقع حسن ظہیر شہید روڈ پر دکھائی دیا، جس پر اسے فوری گرفتار کر لیا گیا۔
پولیس حکام کا کہنا ہے کہ دوران تلاشی ملزم کے قبضے سے 420 گرام چرس برآمد ہوئی، گرفتار ملزم کے خلاف مقدمہ درج کر لیا گیا ہے، اور اس کے سابقہ کریمنل ریکارڈ کی چیکنگ اور مزید تفتیش کا عمل جاری ہے۔
