آئرلینڈ کی السٹر یونیورسٹی نے ارشد شریف شہید کی یاد میں ان سے منسوب ایوارڈ کا اعلان کیا ہے، اس سلسلے میں یونیورسٹی انتظامیہ نے ارشد شریف کی بیوہ سمعیہ ارشد کو خط لکھ دیا۔
اس حوالے سے ترجمان السٹر یونیورسٹی کا کہنا ہے کہ ارشد شریف ایوارڈ کا انعقاد تحقیقاتی صحافت کی بنیاد پر کیا گیا ہے، مذکورہ ایوارڈ بہترین تحقیقاتی صحافت کے معیار پر اترنے والے طالب علم کو دیا جائے گا۔
السٹر یونیورسٹی کی جانب سے لکھے گئے خط میں کمیونیکیشن اینڈ میڈیا اسکول اسٹاف نے ارشد شریف کی شہادت پر گہرے دکھ اور افسوس کا اظہار کیا۔
ڈاکٹر کولم مرفی نے کہا کہ ارشد شریف 17 سال پہلے اسی یونیورسٹی کے طالب علم تھے، ارشد شریف نے السٹر یونیورٹی سے میڈیا اسٹڈیز میں ماسٹرز کیا۔
انہوں نے کہا کہ ارشد شریف شمالی آئرلینڈ میں گہری دلچسپی رکھتے تھے، ان کے پاکستان میں صحافتی کارناموں پر ہمیں فخر ہے، بہادری، دیانت اور معاملہ فہمی پر ارشد شریف کو خراج عقیدت پیش کرتے ہیں۔
اپنے خط میں ڈاکٹر کولم مرفی کا کہنا ہے کہ یونیورسٹی اوریٹری کے ٹری آف ہوپ میں شہید صحافی کا نام شامل کرلیا گیا ہے، ارشد شریف ایوارڈ یونیورسٹی خود اسپانسر کرے گی۔
انہوں نے مزید کہا کہ ارشد شریف ایوارڈ کا مقصد صحافیوں کی نئی نسل کی حوصلہ افزائی کرنا ہے، اپنے خط میں انہوں نے سمعیہ ارشد سے درخواست کی ارشد شریف ایوارڈ کے لئے ہمیں آپ کی رضامندی درکار ہے۔
