سابق صدر آصف علی زرداری نے کہا ہے کہ اداروں کا سیاست سے لا تعلقی کا اعلان شہید بینظیر بھٹو کے خواب کی تعبیر ہے۔
سابق وزیراعظم بینظیر بھٹو کی آج 15 ویں برسی منائی جا رہی ہے۔ اس موقع پر سابق صدر اور شہید بینظیر کے شوہر آصف علی زرداری نے اپنے پیغام میں ان کی ملک اور جمہوریت کے لیے دی جانے والی قربانیوں پر انہیں زبردست خراج عقیدت پیش کیا ہے۔
آصف زرداری نے کہا کہ بینظیر بھٹو شہید نے آمروں کی بہادری سے مزاحمت کی تھی۔ جمہوریت کا تسلسل ان کا خوبصورت خواب تھا اور آج اداروں کا سیاست سے لاتعلقی کا اعلان ان کے اس خواب کی تعبیر ہے۔ آئین پر عمل سے جمہوریت کو استحکام ملے گا اور ملک کی شاندار ساکھ قائم ہوگی۔
سابق صدر نے کہا کہ سیاست میں بینظیر بھٹو نے میری رہنما کی اور ان کی فلاسفی اب بھی میری رہنمائی کر رہی ہے۔ میں شہید بینظیر کے مشن کے حوالے سے نیند میں بھی غفلت نہیں کرسکتا۔
یہ بھی پڑھیں: ’بے نظیر بھٹو جیسے کرشماتی لیڈر صدیوں میں پیدا ہوتے ہیں‘
ان کا کہنا تھا کہ الحمدللہ میں نے محترمہ شہید کے اس خواب کی تکمیل کر دی ہے۔ موجودہ اسمبلیاں اپنی مدت پوری کریں گی اور ملک مضبوط اور پائیدار جمہوریت کے راستے پر گامزن ہوگا۔
