اسلام آباد: وزیر اعظم شہباز شریف کا کہنا ہے کہ تحریک انصاف نے اپنے دورِ حکومت میں سستا تیل اور گیس نہ خرید کر غفلت کا مظاہرہ کیا۔
شمسی توانائی سے متعلق کانفرنس سے خطاب میں وزیر اعظم شہباز شریف نے کہا کہ گزشتہ حکومت کی مجرمانہ غفلت نے ملک کو معاشی مسائل کا شکار کیا، پی ٹی آئی دور میں توانائی اصلاحات نہ ہونے سے گردشی قرضے ریکارڈ سطح پر پہنچے، لائن لائسز اور بجلی چوری گردشی قرضے میں اضافے کی بڑی وجوہات ہیں۔
وزیر اعظم نے کہا: ’گزشتہ حکومت نے احتساب کے نام پر سیاسی مخالفین کو نشانہ بنایا۔ پی ٹی آئی دور میں نیب کے ذریعے بدترین انتقامی کارروائیاں کی گئیں۔ عمران نیازی نے ملک کی تعمیر و ترقی اور خوشحالی کا راستہ روکا۔ نیب نیازی گٹھ جوڑ نے ملک کو بے پناہ نقصان پہنچایا۔‘
شہباز شریف نے کہا کہ روس اور یوکرین کے درمیان جنگ سے عالمی مارکیٹ میں تیل کی قیمتوں میں اضافہ ہوا، جنگ کے نتیجے میں عالمی سطح پر گیس کا بحران بھی پیدا ہوا، مہنگے ایندھن کے باعث معاشی مسائل درپیش ہیں، امیر ملک منہ مانگی قیمت پر گیس خرید رہے ہیں جبکہ ترقی پذیر ممالک مہنگے داموں گیس خریدنے پر مجبور ہیں، کورونا وبا میں تیل اور گیس کی قیمتیں نیچے آگئی تھیں۔
کانفرنس میں وزیر اعظم نے بتایا کہ سرکاری عمارتوں کی شمسی توانائی پر منتقلی کا منصوبہ تیار ہے، آئندہ سال اپریل تک سرکاری عمارتوں کو شمسی توانائی پر منتقل کر دیا جائے گا، توانائی کے حصول کے لیے مقامی کوئلے کو بھی برائے کار لا رہے ہیں، قابلِ تجدید توانائی ذرائع پر انحصار وقت کی اہم ضرورت ہے۔
مہنگائی پر بات کرتے ہوئے شہباز شریف نے کہا کہ اتحادی حکومت معاشی مسائل کے حل کے لیے کوشاں ہے، مہنگائی میں پسے عوام کی ہم سے توقعات وابستہ ہیں، ہمیں عوام کا اعتماد بحال کرنا ہے، عوام کو ریلیف دینے کے لیے آئی ایم ایف کی جانب دیکھنا پڑتا ہے، عوام کا اعتماد بحال کرنے کے لیے دن رات محنت کر رہے ہیں۔
