کراچی : کرکٹ کھیلنے کے دوران ہونے والی تلخ کلامی خونی جھگڑے میں تبدیل ہوگئی، بال گاڑی پر لگنے کے بعد پڑوسی نے فائرنگ کردی جس سے دو لڑکے زخمی ہوگئے۔
کراچی کے علاقے جہانگیر روڈ میں گاڑی پر بال لگنے کے بعد محلے میں گولیاں چل گئیں، فائرنگ کا واقعہ گلی میں کرکٹ کھیلنے کے دوران پیش آیا۔ مشتعل مکینوں نے فائرنگ کرنے والے کے گھر کو احتجاجاً کئی گھنٹے تک گھیرے میں لیے رکھا۔
اس حوالے سے پولیس کا کہنا ہے کہ چند لڑکے گلی میں کرکٹ کھیل رہے تھے کہ اس دوران بال پڑوسی کی گاڑی پر لگ گئی۔
گاڑی کے مالک سہیل کی گاڑی کو بظاہر تو کوئی نقصان نہیں ہوا، لیکن وہ آواز سن کر گھر سے باہر آیا اور مغلطات بکنے لگا، جس پر وہاں موجود لڑکوں اور سہیل میں ہاتھا پائی ہوگئی۔
سہیل غصے میں واپس جا کر گھر سے پستول نکال لایا اور گولیاں چلا کر2لڑکوں کو زخمی کردیا، پولیس نے فائرنگ کرنے والے ملزم سہیل الیاس کو گرفتارکرلیا ہے،زخمی ہونے والوں کی عمریں25اور40سال ہے۔
یاد رہے کہ اس سے قبل 24دسمبر بروز ہفتے کو راولپنڈی کے تھانہ روات کی حدود میں والی بال میچ جاری تھا کہ معمولی تلخ کلامی پر گولیاں چل گئیں جس سے ایک مقامی کھلاڑی موقع پر ہی جاں بحق ہوگیا۔
