ریاض: سعودی عرب میں ٹریفک سگنل توڑنے پر جرمانہ کم کرنے کی تجویز سامنے آئی ہے۔

تفصیلات کے مطابق سعودی مجلس شورٰی کے ایک سابق رکن میجر جنرل (ر) عبداللہ السعدون نے ٹریفک سگنل توڑنے پر جرمانے کی رقم 3 ہزار سے کم کر کے 500 ریال کرنے کی تجویز دی ہے۔

انھوں نے جرمانے میں کمی کے حق میں دلیل دی کہ ’بیش تر افراد جان بوجھ کر سگنل نہیں توڑتے، سگنل توڑنے کا عمل غلطی سے بھی ہوتا ہے، اور اس کے متعدد اسباب ہوتے ہیں، جیسا کہ سگنل کے وسط میں گاڑی روکنی پڑ جاتی ہے۔‘

اخبار 24 کے مطابق سابق رکن شوریٰ نے اپنے ٹوئٹر اکاؤنٹ پر ارکان شوریٰ سے درخواست کی کہ ’وہ اس تجویز پر ٹریفک قانون کی متعلقہ دفعہ میں ترمیم کریں۔‘

سابق رکن شوریٰ کی تجویز کی ایک رکن شوریٰ نے حمایت کی جب کہ دیگر نے اس کی مخالفت میں رائے دی ہے۔ ان کا مؤقف ہے کہ ٹریفک سگنل کی خلاف ورزی کرنے والا کڑی سے کڑی سزا کا مستحق ہے۔

سوشل میڈیا پر ایک صارف کا کہنا تھا کہ جو شخص دوسروں کی زندگی کو خطرے میں ڈال رہا ہو، وہ اس بات کا مستحق ہے کہ اس پر نہ صرف بڑا جرمانہ ہو بلکہ اس کا ڈرائیونگ لائسنس بھی ضبط کر لیا جائے۔