لاہور: قومی کرکٹر محمد عامر نے بابر اعظم کی کپتانی کے بارے میں کہا کہ انہیں پہلے کپتانی کے لیے تیار نہیں کیا گیا۔
محمد عامر نے نجی میڈیا کو دیے گئے انٹرویو میں بابر کی کپتانی کے بارے میں کہا کہ جب نیا لڑکا کپتان بنتا ہے تو اسے سینئرز کی سپورٹ لازمی ہونی چاہیے ہوتی ہے، بابر کی کپتانی کے دوران ان کے ساتھ کوئی سینئر کھلاڑی نہیں تھا جو انہیں ساتھ ساتھ گائیڈ کرسکے۔
فاسٹ بولر عامر کا کہنا تھا کہ کیوں کہ بطور کپتان بابر نے کپتانی سمیت بیٹنگ، بولرز، اوور ریٹ، رن ریٹ سب کچھ دیکھنا ہے، مجھے لگتا ہے کہ بابر کو جلدی کپتانی دی گئی، ہونا یوں چاہیے تھا کہ بابر کو کپتانی کیلئے پہلے تیار کیاجاتا ہے۔
سابق کپتان سرفراز احمد کی کپتانی سے ہی بابر کو تیار کیا جاتا کیوں کہ مسٹر پرفیکٹ کوئی بھی نہیں ہوتا ،اگر میں کہوں کہ میں پرفیکٹ بولر ہوں تو ایسا ممکن نہیں لہٰذا بابر کی کپتانی میں اچھا ہوتا کہ ان کے ساتھ سینئر پلیئرز بھی ہوتے جو بابر کی رہنمائی کرتے۔
کرکٹر کا کہنا تھا کہ یونس خان کی کپتانی میں کھیلنے کا بہت مزا آیا، انہوں نے مجھے بہت بہترین طریقے سے گراؤنڈ میں بہت کچھ سیکھایا۔
محمد عامر نے مزید کہا کہ سرفراز کی کپتانی کے حوالے سے انہوں نے کہا کہ سیفی بھائی بائے برتھ کپتان ہیں، وہ ٹیم کے لیے مفید فیصلے لیتے تھے۔
