کراچی : ملک بھر میں سونے کی قیمت تاریخ کی بلند ترین سطح پر پہنچ چکی ہے اور اس میں یومیہ بنیادوں پر مسلسل اضافہ ہوتا جارہا ہے۔
تفصیلات کے مطابق پاکستان میں سونے کی قیمت تاریخ کی نئی بلندیوں پر پہنچ گئی، فی تولہ نرخ 900 روپے کے مزید اضافے سے ایک لاکھ 88 ہزار 600 روپے پر پہنچ گئی۔
صراف اینڈ جیولرز ایسوسی ایشن سے جاری اعداد و شمار کے مطابق پاکستان میں سونے کے فی تولہ نرخ 900روپے کے اضافے کے بعد ایک لاکھ 88 ہزار 600 روپے اور10 گرام 772 روپے بڑھ کر ایک لاکھ 61 ہزار 694 روپے کا ہوگیا۔
عالمی مارکیٹ میں بھی سونے کی قیمت میں اضافے کا سلسلہ جاری ہے اور آج مارکیٹ میں 29 ڈالر اضافے سے فی اونس سونا 1862 ڈالر پر پہنچ گیا۔
دوسری جانب چاندی کے دام عالمی اور مقامی مارکیٹ میں مستحکم رہے, مقامی مارکیٹ میں چاندی کی قیمت 2150روپے فی تولہ ہے۔
