اے آر وائی ڈیجیٹل کے ڈرامہ سیریل ’تیرے بنا میں نہیں‘ نے مداحوں کی توجہ اپنی جانب مبذول کروالی، یوٹیوب پر دوسری قسط کو دس لاکھ سے زائد صارفین دیکھ چکے ہیں۔
سکس سگما پلس کی پیشکش ڈرامہ سیریل ’تیرا بنا میں نہیں‘ میں سینئر اداکار جاوید شیخ کے صاحبزادے شہزاد شیخ (مرتضیٰ)، سونیا حسین (نور)، عائزہ اعوان (تہنیت) مرکزی کردار نبھا رہے ہیں۔ دیگر کاسٹ میں خالد انعم، بشریٰ انصاری، ظہیر لہری، انعم تنویر، فواد جلال، منزہ عارف ودیگر شامل ہیں۔
ڈرامے کی کہانی ماہا ملک نے لکھی ہے جبکہ اس کی ہدایت کاری کے فرائض علی مسعود سعید نے انجام دیے ہیں، پروڈیوسرز ہمایوں سعید اور شہزاد نصیب ہیں۔
View this post on Instagram
’تیرے بنا میں نہیں‘ کی کہانی مرتضیٰ، نور اور تہنیت کے گرد گھومتی ہے جس میں دکھایا گیا ہے کہ کس طرح نور کسی قابل بننے کی خاطر محبت کو ٹھکرا دیتی ہیں جس کے بعد مرتضیٰ کی زندگی میں تہنیت کی آمد ہوتی ہے۔
مرتضیٰ کی کزن نور کی جانب سے شادی کے لیے کچھ وقت مانگا جاتا ہے لیکن والدہ بشریٰ انصاری رشتہ توڑ کر آجاتی ہیں اور بڑے بیٹے کی ٹیچر نور کی دوست تہنیت کے لیے مرتضیٰ کا رشتہ مانگ لیتی ہیں۔
دوسری قسط میں دکھایا گیا کہ ’نور، کزن مرتضیٰ سے محبت تو کرتی ہیں لیکن کہتی ہیں کہ فی الحال میں شادی نہیں کرسکتی کیونکہ مجھے ابھی کسی قابل بننا ہے۔‘
انہیں گھر والوں کی جانب سے بارہا سمجھایا جاتا ہے کہ مرتضیٰ اچھا لڑکا ہے تم اسے چھوڑ کر پچھتاؤ گی لیکن وہ کسی کی نہیں سنتی اور نتیجہ یہ نکلتا ہے کہ پھوپھو بچپن میں طے کیا گیا رشتہ ہی توڑ دیتی ہیں۔
’تیرے بنا میں نہیں‘ میں مزید کیا ہونے جارہا ہے، کیا تہنیت اور مرتضیٰ کی شادی ہوجائے گی؟ کیا نور اپنی دوست تہنیت کی دشمن بن جائیں گی؟ کیا نور بعد میں اپنے فیصلے پر پچھتائیں گی، یہ جاننے کے لیے تیسری قسط دیکھیں۔
