امارات اسلامیہ افغانستان نے برطانوی شہزادہ ہیری کے افغانستان میں فوجی آپریشن کے دوران 25 افراد کو قتل کرنے کے اعتراف پر سخت ردعمل دے دیا۔
غیر ملکی میڈیا کے مطابق طالبان حکومت کے ایک سینئر رہنما انس حقانی نے برطانوی شہزادے کو مخاطب کرتے ہوئے کہا: ’مسٹر ہیڑی! جن لوگوں کو آپ نے قتل کیا وہ شطرنج کے مہرے نہیں بلکہ انسان تھے اور ان کے خاندان بھی ہیں جو اپنے پیاروں کی واپسی کے منتظر تھے۔‘
انس حقانی نے کہا کہ درحقیقت یہ معصوم لوگ آپ کے سیاستدانوں اور فوجیوں کے لیے شطرنج کے مہرے تھے، آپ لوگوں کو اس کھیل میں بُری طرح شکست ہوئی، ویسے تو عالمی ادارے آپ لوگوں کے بہرے اور اندھے ہیں لیکن امید ہے عالمی عدالت آپ کو طلب کرے گی اور انسانی حقوق کے کارکن آپ کی حرکت پر مذمت کریں گے۔
یاد رہے کہ برطانوی شہزادہ ہیری نے افغانستان میں ایک مشن کے دوران 25 افراد کو ہلاک کرنے کا دعویٰ کیا ہے۔
شہزادہ ہیری نے اپنی سوانح عمری میں انکشاف کیا کہ میں نے افغانستان میں اپاچی ہیلی کاپٹر کے پائلٹ کے طور پر بھی ذمے داریاں نبھائیں، دوران ڈیوٹی چھ فضائی آپریشن کیے۔
ان کا کہنا تھا کہ اس دوران ہلاکتوں پر فخر ہے اور نہ کوئی شرمندگی کیوں کہ جنگی حالت میں مارے جانے والوں کو شطرنج کے مہرے سمجھ کر بساط سے ہٹایا۔
شہزادے ہیری کی یہ کتاب ’اسپیئر‘ 10 جنوری کو جاری ہوگی۔
