کراچی : ایم کیوایم پاکستان نے الیکشن کمیشن پر الزام پر عائد کیا ہے کہ اس نے متعصبانہ فیصلہ کرکے انصاف کے تقاضے پورے نہیں کیے۔
اس حوالے سے ترجمان ایم کیوایم پاکستان نے اپنے ایک جاری بیان میں کہا ہے کہ غیرجانبدارانہ بلدیاتی انتخابات کا انعقاد ہی الیکشن کمیشن کی ذمہ داری ہے۔
ترجمان کے مطابق الیکشن کمیشن نے تمام قانونی تقاضوں کو بھی پس پشت ڈال دیا، جعلی حلقہ بندیوں کی وجہ سے شہری سندھ کی ایک چوتھائی آبادی محروم رہ گئی۔
ایم کیو ایم پاکستان کا مؤقف ہے کہ مہاجروں اور سندھ کے شہری علاقوں کی نمائندگی چھینی جارہی ہے، جعلی حلقہ بندیوں سے دھاندلی ہورہی ہے جسے ہرگز تسلیم نہیں کیا جائے گا۔
ثابت ہوگیا ہے کہ الیکشن کمیشن گزشتہ انتخابات میں کی گئی دھاندلی نہیں رکوا سکا جو اس کی شفافیت پر سوالیہ نشان ہے، الیکشن کمیشن کے متعصبانہ فیصلے کیخلاف تمام دروازے کھٹکھٹائیں گے۔
مزید پڑھیں : ایم کیو ایم کا الیکشن کمیشن کے باہر احتجاج، فاروق ستار بھی شرکت کریں گے
واضح رہے کہ کراچی میں حلقہ بندیوں اور ووٹر لسٹوں کے معاملے پر ایم کیوایم کل الیکشن کمیشن کے باہر احتجاجی مظاہرہ کرے گی۔
ڈاکٹر فاروق ستار کارکنان کے ساتھ کل مظاہرےمیں شرکت کریں گے، ان کا کہنا ہے کہ کراچی اور حیدرآباد کے حق کے لئے آواز اٹھانی ہے ہمیں مردم شماری میں کم گنا جاتا ہے۔
