اسلام آباد : عالمی بینک کا کہنا ہے کہ پاکستان کی معیشت شدید مشکلات کا شکار ہے اور ملک میں مہنگائی انیس سوستر کی دہائی کے بعد بلند ترین سطح پرہے۔
تفصیلات کے مطابق عالمی بینک نے پاکستانی معشیت سے متعلق رپورٹ جاری کردی، جس میں کہا ہے کہ موجودہ مالی سال پاکستان کی معاشی شرح نمو دوفیصد رہنے کا امکان ہے۔
عالمی بینک کا کہنا ہے کہ پاکستان کی معیشت شدید مشکلات کا شکار ہے اور ملک میں مہنگائی انیس سوستر کی دہائی کے بعد بلند ترین سطح پرہے۔
عالمی معاشی اثرات سے متعلق رپورٹ میں بتایا گیا ہے کہ پاکستان کومشکل معاشی حالات کا سامنا ہے، دسمبرمیں مہنگائی کی شرح چوبیس اعشاریہ پانچ فیصد رہی۔
رپورٹ کے مطابق سیلاب سے جی ڈی پی کو چاراعشاریہ آٹھ فیصد کے برابر نقصان پہنچا اور جون سے دسمبرکے دوران ڈالرکےمقابلے میں پاکستانی روپےنے چودہ فیصد قدر کھودی جبکہ کنٹری رسک پریمیئم پندرہ فیصد بڑھ چکاہے۔
عالمی بینک نے کہا ہے کہ حالیہ بدترین سیلاب اور سیاسی بے یقینی پاکستان کے مشکل معاشی حالات کی بڑی وجوہات ہیں اور پاکستان کوبیرونی قرض کی ادائیگیوں کے شدید خطرات کا سامنا ہے۔
شدید موسم خوراک اورضروری اشیاء کی سپلائی کومتاثرکرسکتا ہے اور ساتھ ہی انفرا اسٹرکچر اور زرعی پیداوارکو نقصان پہنچنے کا بھی امکان ہے۔
اس سے پہلے عالمی بینک نے پاکستان کیلئے چار فیصد جی ڈی پی گروتھ کی پیش گوئی کی تھی۔
