کراچی : تحریک انصاف کے رہنما اور سندھ اسمبلی میں اپوزیشن لیڈر حلیم عادل شیخ نے کہا کہ بلدیاتی الیکشن کو کالعدم قراردلواکرہی دم لیں گے۔
اے آر وائی نیوز کے پروگرام باخبر سویرا میں گفتگو کرتے ہوئے حلیم عادل شیخ نے کہا کہ بلدیاتی الیکشن سے پہلےآخری رات تک کسی کوپتا نہیں تھا کہ الیکشن ہوں گے بھی یا نہیں، پیپلز پارٹی کو ووٹرز سےکوئی غرض نہیں تھی۔
حلیم عادل شیخ نے کہا کہ بلدیاتی الیکشن میں فارم 11 کچھ اور کہہ رہا ہے اور ڈی آراو کچھ اورکہہ رہاہے، اس لیے ہم چاہتے ہیں بلدیاتی الیکشن کو کالعدم قرار دیا جائے۔
حلیم عادل شیخ نے پروگرام میں گفتگو کرتے ہوئے کہا کہ ہم عدالتوں میں جائیں گے اور دیگر فورم بھی استعمال کریں گے، ہم یہ بلدیاتی الیکشن قبول نہیں کرتے، پیپلز پارٹی نے پہلےسندھ تباہ کردیا، ان کا میئر نہیں بننےدیں گے، بلدیاتی الیکشن کو کالعدم قراردلواکرہی دم لیں گے۔
پی ٹی آئی رہنما نے کہا کہ جو لوگ بلدیاتی الیکشن کے نتائج پر احتجاج کر رہے ہیں ان پر ظلم ہورہا ہے، ملک میں قانون نام کی کوئی چیز ہی نہیں ہے۔
حلیم عادل شیخ نے کہا کہ انشااللہ اپریل میں عام انتخابات ہونےجارہے ہیں، عام انتخابات کے ملک میں نئی قانون سازی ہوگی، نئے ایکٹ کےتحت صاف وشفاف انتخابات ہونے چاہئیں۔
