راولپنڈی : سربراہ عوامی مسلم لیگ شیخ رشید کا کہنا ہے کہ ملک کو بچانے کیلئے عوام کو حکومت کے خلاف اعلان جنگ کرنا ہوگا۔
تفصیلات کے مطابق سربراہ عوامی مسلم لیگ شیخ رشید نے اپنے بیان میں کہا ہے کہ حکومت کو معلوم نہیں کہ زمین کتنی گرم ہورہی ہے، سیاست سے بات آگے نکل گئی اور ملک خانہ جنگی کی طرف جا رہا ہے۔
شیخ رشید نے محسن نقوی کو آصف زرداری کا فرنٹ مین قراردیتے ہوئے نگراں وزیراعلیٰ پنجاب کے تقرر کے خلاف سپریم کورٹ جانے کا اعلان کردیا۔
سربراہ عوامی مسلم لیگ کا کہنا تھا کہ ملک میں معاشی تباہی کے بعد اب توانائی کی تباہی آگئی ہے، فیصلہ اب سڑکوں پر ہوگا اور ملک کو بچانے کیلئے عوام کو حکومت کے خلاف اعلان جنگ کرنا ہوگا۔
پنجاب کی صورتحال کے حوالے سے انھوں نے کہا کہ پنجاب میں بغیرڈولی کے سیاسی دلہنیں آگئی ہیں، حکمرانوں کی نااہلی کی وجہ سے ملک کا کیاحال ہوگیا ہے، کل 3 بجے لا ل حویلی میں پریس کا نفرنس کروں گا۔
پی ڈی ایم پر تنقید کرتے ہوئے شیخ رشید کا کہنا تھا کہ الیکشن میں تیرہ جماعتوں کی موت ہے،اس لیے یہ بھاگ رہے ہیں۔
