لاہور: پی ٹی آئی رہنما فواد چوہدری کو عدالتی حکم کے باوجود پیش نہ کرنے پر آئی جی پنجاب اور آئی جی اسلام آباد کیخلاف توہین عدالت کی درخواست دائر کردی گئی۔
تفصیلات کے مطابق تحریک انصاف کے رہنما فواد چوہدری کو احکامات کے باوجود عدالت میں پیش نہ کرنے پر لاہور ہائی کورٹ میں توہین عدالت کی درخواست دائر کر دی گئی۔
درخواست فواد چودھری کے قریبی عزیز نبیل شہزاد نے اظہر صدیق ایڈووکیٹ کے ذریعے دائر کی ہے، جس میں آئی جی اسلام آباد اور آئی جی پنجاب سمیت دیگر کو فریق بنایا گیا ہے۔
درخواست میں موقف اختیار کیا گیا ہے کہ 25 جنوری کو ہائیکورٹ نے بار بار فواد چوہدری کو عدالت پیش کرنے کے احکامات دیئے لیکن اسلام آباد پولیس نے عدالتی احکامات کے باوجود فواد چوہدری کو پیش نہیں کیا۔
درخواست گزار کا کہنا تھا کہ پولیس نے جان بوجھ کر عدالتی احکامات سے انحراف کیا، عدالتی احکامات کے بارے میں مختلف ذرائع سے پولیس حکام کو آگاہ کیاگیا مگر پولیس نے اسے نظر انداز کی۔
درخواست میں کہا کہا گیا کہ ہاٸی کورٹ کے احکامات پر عمل نہ کرنا توہین عدالت کے زمرے میں آتا ہے اس لیے ذمہ دار افسران کے خلاف توہین عدالت کی کارروائی کی جائے۔
