بھارتی کرکٹر کے ایل راہول کی اداکارہ اتھیا شیٹی سے شادی کے بعد کرکٹر اکشر پٹیل نے بھی شادی کرلی۔

بھارتی میڈیا رپورٹس کے مطابق کرکٹر اکشر پٹیل اور میہا پٹیل گزشتہ روز شادی کے بندھن میں بندھ گئے، شادی کی تقریب میں قریبی عزیز اور ساتھی کرکٹرز نے شرکت کی۔

اکشر نے اپنی دیرینہ دوست اور منگیتر میہا پٹیل سے شادی کی ہے جو ماہر غذائیت ہیں۔

کرکٹر کی شادی کی تصاویر اور ویڈیوز سوشل میڈیا پر وائرل ہورہی ہیں اور مداحوں کی جانب سے انہیں مبارک باد دینے کا سلسلہ جاری ہے۔

اکشر کے والد راجیش پٹیل نے کہا کہ یہ ہر باپ کا خواب ہوتا ہے کہ وہ اپنے بیٹے یا بیٹی کی شادی دیکھیں میں بیٹے کی شادی پر بہت خوش ہوں۔

انہوں نے بتایا کہ اکشر اور میہا دس سال سے دوست ہیں ان کے مصروف شیڈول کی وجہ سے ہم شادی کی تاریخ طے نہیں کرسکے تھے۔

واضح رہے کہ اکشر اور میہا کی منگنی گزشتہ برس جنوری میں ہوئی اور ایک سال کے بعد دونوں رشتہ ازدواج میں منسلک ہوئے۔

یاد رہے کہ اکشر کو بی سی سی آئی نے حال ہی میں ختم ہونے والی ون ڈے سیریز کے ساتھ ساتھ نیوزی لینڈ کے خلاف جاری ٹی ٹوئنٹی سیریز سے چھٹی دی تھی۔

Comments