اسلام آباد: وفاقی حکومت نے ہائر ایجوکیشن کمیشن (ایچ ای سی) کی خودمختاری ختم کرنے کا فیصلہ کر لیا ہے۔
ذرائع کے مطابق وفاقی حکومت ہائر ایجوکیشن کمیشن کے قیام کے آرڈی نینس 2002 میں ترامیم لا رہی ہے، ایچ ای سی کو اعلیٰ اختیاراتی خود مختار فورم کی بجائے وفاقی وزارت تعلیم کے ماتحت کیا جائے گا۔
ذرائع کا کہنا ہے کہ کمیشن کے 18 رکنی خودمختار فورم میں صوبوں کی نمائندگی ختم کرنے کا فیصلہ کیا گیا ہے، جس سے اراکین کی تعداد 10 تک محدود ہو جائے گی۔
ترمیم کے بعد ہائر ایجوکیشن کمیشن میں ایگزیکٹو ڈائریکٹر کی تعیناتی اراکین ایچ ای سی کی بجائے وفاقی حکومت کرے گی، ترامیم کے تحت چیئرمین ہائر ایجوکیشن کمیشن کی مدت ملازمت بھی 4 سال سے کم کر کے 2 سال کرنے کا فیصلہ کیا گیا ہے۔
ذرائع کا کہنا ہے کہ مجوزہ ترامیم کے تحت وفاقی وزیر تعلیم کارکردگی سے عدم اطمینان کی صورت میں چیئرمین کو کسی بھی وقت سبک دوش کر سکیں گے۔
