ضمانت منظور ہونے کے بعد رہنما تحریک انصاف فوادچوہدری کو اڈیالہ جیل سے رہا کر دیا گیا۔
سیشن عدالت نے الیکشن کمیشن کو دھمکیاں دینے کے کیس میں پی ٹی آئی رہنما فواد چوہدری کی ضمانت منظور کی تھی۔
عدالتی احکامات ملنے پر روبکاری جاری کیے گئے جس کے بعد ضابطے کی کارروائی کر کے فوادچوہدری کو رہا کر دیا گیا۔
اڈیالہ جیل کے باہر پی ٹی آئی کارکنان کی بڑی تعداد موجود تھی۔ کارکنوں کی جانب سے فواد چوہدری کا شانداراستقبال کیا گیا ان پر پھول نچھاور کیے گئے اور کارکنوں نے انہیں کندھوں پر بٹھا لیا۔
قبل ازیں وکیل الیکشن کمیشن کے دلائل مکمل ہونے پر وکیل بابراعوان نے جواب الجواب دلائل دیتے ہوئے کہا کہ دوران تفتیش پراسیکیوشن نے اعظم سواتی کیساتھ جو کیا وہ سامنے ہے، مورالیٹی کی بات کرتےہیں،اعظم سواتی کو ویڈیو بھیجی گئی، پراسیکیوشن نیا مدعی ڈھونڈ رہی تاکہ کسی نئےادارے کی توہین ہو۔
سیشن عدالت نے فوادچوہدری کی ضمانت منظور کرلی ، عدالت نے 20ہزار کےضمانتی مچلکوں کے عوض ضمانت منظور کی۔
جج فیضان گیلانی نے ریمارکس دیے اس شرط پر ضمانت دے رہا ہوں کہ فواد چوہدری یہ گفتگو دوبارہ نہیں کریں گے ، پارلیمنٹیرینز کو ایسے بیانات نہیں دینے چاہئیں، فوادچوہدری کو ایسا بیان نہیں دینا چاہئے تھا۔
