ملتان : تحریک انصاف کے وائس چیئرمین شاہ محمود قریشی نے کہا ہے کہ حکمران پہلے یہ طے کرلیں ہم سیاستدان ہیں یا دہشت گرد ہیں۔
یہ بات انہوں نے اے آر وائی نیوز کے پروگرام سوال یہ ہے میں خصوصی گفتگو کرتے ہوئے کہی، ان کا کہنا تھا کہ ہم ملک کو کسی صورت نقصان نہیں پہنچانا چاہتے۔
شاہ محمود قریشی کہا کہ آئین میں واضح ہے کہ الیکشن90دن کے اندر کرانے ہیں، حکومت کی نیت واضح ہے کہ الیکشن کسی صورت نہیں کرانے۔
انہوں نے کہا کہ جس آر او نے مجھے کل کاغذات نامزدگی دیے رات اس کا تبادلہ کردیا گیا، ایسی حرکتیں وضاحت کررہی ہیں کہ یہ لوگ الیکشن نہیں چاہتے، کاغذات نامزدگی سے ہی دھاندلی شروع ہوگئی تو کون انتخابی نتائج کو قبول کرے گا۔
ایک سوال کے جواب میں پی ٹی آئی رہنما کا کہنا تھا کہ اے پی سی کی دعوت دیتے ہیں اور ساتھ میں الزامات بھی لگا دیتے ہیں، سیاسی لوگوں کو اٹھایا جارہا ہے، تشدد اور بغاوت کے مقدمات ہورہے ہیں۔
شاہ محمود نے کہا کہ جب ہمیں گرفتار کرنا ہی ہے تو ایک ہی بار کرلیں، پہلے یہ طے کرلیں ہم سیاستدان ہیں یا دہشت گرد ہیں؟ ہم ملک کو کسی صورت نقصان نہیں پہنچانا چاہتے، ہم تو ملک کیلئے ہی الیکشن مطالبہ کررہے ہیں جو ہمارا حق ہے۔
تحریک انصاف کے وائس چیئرمین کا کہنا تھا کہ ہماری خواہش ہے کہ ایسا مینڈیٹ ملے کہ ہم مؤثر قانون سازی کرسکیں اور کسی بیساکھی کی ضرورت نہ ہو۔
