ابو ظہبی: متحدہ عرب امارات کے ایئرپورٹس سے سفر کرنے والے افراد کی تعداد پچھلے برس کی نسبت 3 گنا بڑھ گئی، یہ تعداد 15 ملین سے تجاوز کر گئی ہے۔
اردو نیوز کے مطابق متحدہ عرب امارات میں مطارات ابو ظہبی کمپنی نے کہا ہے کہ یکم جنوری سے 31 دسمبر 2022 تک ابو ظہبی ایئرپورٹس سے 15.9 ملین افراد نے سفر کیا۔
مطارات ابو ظہبی کمپنی نے بتایا کہ ابو ظہبی انٹرنیشنل، العین انٹرنیشنل، البطین پرائیویٹ ایئرپورٹ، جزیرہ دلما ایئرپورٹ اور صیر بنی یاس ایئرپورٹ سے 2022 کے دوران 15.9 ملین افراد نے سفر کیا۔
مسافروں کی یہ تعداد 2021 کے دوران ان پانچوں ایئر پورٹس سے سفر کرنے والوں کی تعداد سے تین گنا زیادہ ہے۔
مطارات ابو ظہبی کا کہنا ہے کہ ابو ظہبی کے پانچوں ایئر پورٹس سے 1 لاکھ 94 ہزار 667 پروازیں 2022 کے دوران روانہ ہوئیں۔
کمپنی کا مزید کہنا ہے کہ ابو ظہبی انٹرنیشنل ایئرپورٹ پر 2022 کی چوتھی سہ ماہی کے دوران 4.78 ملین سے زائد افراد نے سفر کیا، یہ اعداد و شمار یکم اکتوبر سے 31 دسمبر 2022 تک کے ہیں۔
یہ تعداد 2021 کی چوتھی سہ ماہی کے مقابلے میں دگنی ہے۔
