لاہور : پٹرولیم مصنوعات اور دیگر اشیاء کی قیمتوں میں اضافے کے بعد اب چائے کی پتی بھی مہنگی کردی گئی۔
تفصیلات کے مطابق چائے کی پتی مزید200روپے اضافے کے بعد اب1800روپے فی کلو تک پہنچ گئی، اس حوالے سے چائے کے بیوپاریوں نے اس کا الزام بھی حکومت پر عائد کردیا۔
چائے کے درآمد کنندگان کا کہنا ہے کہ چائے کی پتی کی درآمد رکنے کی وجہ سے قیمتوں میں اضافہ ہوا ہے، چائے کی درآمد گزشتہ4 ماہ سے رکی ہوئی ہے۔
چائےامپورٹرز کے مطابق چائے کے250کنٹینرز کراچی پورٹ پر کلیئرنس کے منتظر ہیں، چائے کےمزید250کنٹینرز سمندری راستے پر ہیں، ان کا مزید کہنا ہے کہ پورٹ پر کھڑے کنٹینرز جلد کلیئر نہ کئے گئے تو ماہ رمضان میں چائے بہت مہنگی ہوجائے گی۔
مزید پڑھیں : پاکستانی عوام کروڑوں ڈالر کی چائے پی گئے
علاوہ ازیں گزشتہ ماہ ادارہ شماریات کی جاری رپورٹ کے مطابق جولائی تا دسمبر کے 6ماہ میں سالانہ بنیادوں پر غذائی اشیاء کی درآمدات میں 2.4 فیصد اضافہ ہوا، اس دوران31کروڑ87 لاکھ ڈالرز کی چائے درآمد کی گئی۔
رپورٹ کے مطابق سالانہ بنیادوں پر چائے کی درآمدات میں6.05فیصد کا اضافہ ہوا جبکہ جولائی تا دسمبر2ارب8کروڑ22لاکھ ڈالرز کا پام آئل درآمد کیا گیا۔
