دمشق: اسرائیل نے دمشق پر میزائل حملہ کیا ہے، جس میں ایک فوجی سمیت 5 افراد جاں بحق ہو گئے۔
تفصیلات کے مطابق دمشق کے وسط میں واقع رہائشی علاقے میں اسرائیلی میزائل حملے میں پانچ افراد جاں بحق اور 15 زخمی ہو گئے، اسرائیلی حملے میں متعدد عمارتوں کو نقصان پہنچا۔
شام کی سرکاری میڈیا کے مطابق دارالحکومت دمشق پر اسرائیلی فضائی حملوں میں کم از کم پانچ افراد جاں بحق ہوئے، اور متعدد رہائشی عمارتوں کو نقصان پہنچا، خبر رساں ادارے روئٹرز نے عینی شاہدین کے حوالے سے بتایا کہ اتوار کی صبح میزائل وسطی دمشق کے کفر سوسہ محلے میں ایک بڑی عمارت سے ٹکرائے جو ایرانی تنصیبات کے قریب سخت حفاظتی حصار میں ہے۔
عرب نیوز کے مطابق سیریئن آبزرویٹری فار ہیومن رائٹس کا کہنا ہے کہ ایرانی ثقافتی مرکز کے قریب حملے میں عام شہریوں سمیت 15 افراد جاں بحق ہوئے ہیں۔
The moment an Israeli missile crashes into a residential building in Damascus.#syria #Damascus #israel #damas #attack https://t.co/xt3Gy7zAf3 pic.twitter.com/0ujQpk60ST
— TMJ News Network (@tmjnewsnetwork) February 18, 2023
شامی عرب نیوز ایجنسی کا کہنا تھا کہ جاں بحق افراد میں ایک فوجی بھی شامل ہے، سرکاری میڈیا کی جانب سے پوسٹ کی گئی ایک فوٹیج میں دکھایا گیا کہ حملے میں 10 منزلہ عمارت کو بری طرح نقصان پہنچا ہے، جس سے اس کی نچلی منزل کا ڈھانچہ ٹوٹ گیا ہے۔
واضح رہے کہ 2011 میں شام میں جنگ کے آغاز کے بعد سے اسرائیل نے اپنے پڑوسی کے خلاف سیکڑوں فضائی حملے کیے ہیں، جن میں بنیادی طور پر شامی فوج، ایرانی افواج اور شامی حکومت کے اتحادی لبنان کی حزب اللہ کے ٹھکانوں کو نشانہ بنایا گیا ہے۔
