پشاور: خیبر پختون خوا کے گورنر غلام علی نے سپریم کورٹ کا فیصلہ آنے پر کہا ہے کہ اگر الیکشن کمیشن رابطہ نہیں کرے گا تو میں خود اس سے رابطہ کروں گا۔
تفصیلات کے مطابق پنجاب اور کے پی انتخابات کے حوالے سے لیے گئے از خود نوٹس کیس میں سپریم کورٹ نے اپنا تحریری فیصلہ جاری کر دیا ہے، سپریم کورٹ نے تین دو کی اکثریت سے فیصلے میں کہا کہ الیکشن کمیشن 90 دن میں دونوں صوبوں میں انتخابات کرائے۔
گورنر کے پی غلام علی نے کہا کہ تحریری فیصلے پر من و عن عمل کریں گے، حکم سر آنکھوں پر، الیکشن کی تاریخ کا اعلان تو کرنا ہے، اس کے سوا کوئی چارہ نہیں، حالات جو بھی ہوں سپریم کورٹ کے فیصلے کو مانیں گے۔
انھوں نے کہا ’’یہ بات ریکارڈ پر ہے کہ میں نے دو تین بار مشاورت کی، اب ضروری ہے کہ صدر اور میں آپس میں مشاورت کریں۔‘‘
غلام علی کا کہنا تھا کہ ان کے کسی بھی عمل کو عدالت نے غلط نہیں کہا، ملک کو مزید بحران میں لے جانے کی بجائے سپریم کورٹ کے فیصلے پر عمل کریں گے۔
سپریم کورٹ کا پنجاب اور خیبر پختونخوا میں 90 دن میں انتخابات کرانے کا حکم
واضح رہے کہ سپریم کورٹ نے اپنے تحریری فیصلے میں کہا ہے کہ گورنر کے پی کا انتخابات کا اعلان نہ کرنا آئین سے انحراف ہے، کے پی اسمبلی گورنر نے توڑی اس لیے تاریخ دینا بھی گورنر کا اختیار ہے۔
فیصلے میں کہا گیا ہے کہ صدر کی کے پی انتخابات کے لیے دی گئی 9 اپریل کی تاریخ کالعدم قرار دی جاتی ہے، اب گورنر کے پی الیکشن کمیشن سے مشاورت کر کے تاریخ دیں۔
